Hannes, Henrik og Björn efstir á Íslandsmótinu í skák

Stórmeistararnir Hannes Hlífar Stefánsson og Henrik Danielsen og alþjóðlegi meistarinn Björn Þorfinnsson eru efstir með 4½ vinning að lokinni fimmtu umferð Íslandsmótsins í skák sem fram fór í kvöld. Hannes vann Sigurbjörn Björnsson, Henrik lagði Guðmund Kjartansson og Björn hafði betur gegn Hjörvar Steini Grétarssyni í mjög skemmtilegri skák. 

Stórmeistararnir Héðinn Steingrímsson og Stefán Kristjánsson og alþjóðlegi meistarinn Bragi Þorfinnsson koma næstir með 4 vinninga. Spennan á mótinu er því mjög mikil.

Lenka Ptácníková er efst kvenna með 3½ vinning en mótið nú er jafnframt Íslandsmót kvenna. Jóhanna Björg Jóhannsdóttir og Hrund Hauksdóttir koma næstar með 3 vinninga.

Sem fyrr var nokkuð um óvænt úrslit. Hinn ungi og efnilegi skákmeistari úr Rimaskóla, Oliver Aron Jóhannesson, vann Kristján Eðvarðsson þrátt fyrir 200 skákstigamun. Hrund vann Skotann og stórmeistarabanann Michael Grove þrátt fyrir 350 skákstigamun og ungu ljóninn Vignir Vatnar Stefánsson og Hilmir Freyr Heimisson unnu landsliðskonurnar Hallgerðu Helgu Þorsteinsdóttur og Tinnu Kristínu Finnbogadóttur.

Sjötta umferð fer fram á morgun og hefst kl. 17. Teflt er á efstu hæðinni (20. hæð) í Turninum Borgartúni (Höfðatorg). Mjög góð aðstaða er á skákstað fyrir áhorfendur sem hafa fjölmennt sem aldrei fyrr. Á hæðinni starfar svo kaffihúsið "Birnukaffi" og er farið að draga að sér aðdáendur úr öðrum hæðum hússins.

Það eru margar spennandi viðureignir á morgun. Henrik og Björn mætast, Bragi teflir við Hannes og svo verður stórmeistaraslagur á þriðja borði þar sem Héðinn og Stefán tefla.

• Heimasíða mótsins
• Chess-Results
• Beinar útsendingar 
• Myndir frá fimmtu umferð (GB)