Fimm skákmenn efstir og jafnir á Íslandsmótinu í skák - stórmeistarar mætast í dag

Fimm skákmenn eru efstir og jafnir með fullt hús á Opna Íslandsmótinu í skák en þriðja umferð fór fram í gærkveldi. Það eru stórmeistararnir Hannes Hlífar Stefánsson og Henrik Danielsen, alþjóðlegu meistararnir Hjörvar Steinn Grétarsson og Guðmundur Kjartansson og FIDE-meistarinn Sigurbjörn Björnsson. Enn var nokkuð um óvænt úrslit í gærkveldi og má þar nefna að Óskar Long Einarsson vann landsliðskonuna Hallgerði Helgu Þorsteinsdóttur og Hjálmar Sigurvaldason vann Sigríði Björg Helgadóttur en stigamunurinn í þessum tilfellum er um 400 skákstig.

Meðal annarra óvænta úrslita má nefna að Kristján Eðvarðsson gerði jafntefli við stórmeistarann Stefán Kristjánsson, Tinna Kristín Finnbogadóttir við Gylfa Þórhallsson og Atli Jóhann Leósson við Stefán Bergsson Bandaríski lögmaðurinn og skákáhugamaðurinn Peter Henner hefur einnig staðið sig vel og hefur 2,5 vinning en í gærkveldi vann hann Sævar Bjarnason en hafði gert jafntefli við Björn Þorfinnsson fyrr um daginn.

Lenka Ptácníková og Tinna Kristín eru efstar kvenna með 2 vinninga en mótið nú er jafnframt Íslandsmót kvenna. Þær mætast í umferð dagsins.

Fjórða umferð hefst í dag kl. 17. Þá byrja stigahæstu keppendurnir að mætast innbyrðis. Stórmeistararnir Henrik og Hannes mætast sem og alþjóðlegu meistararnir Hjörvar og Guðmundur. Sigurbjörn teflir við Stefán Kristjánsson.

Eftirtaldar skákir verða sýndar beint:

1. AM Hjörvar Steinn Grétarsson (3) - AM Guðmundur Kjartansson (3)
2. SM Henrik Danielsen (3) - SM Hannes Hlífar Stefánsson (3)
3. FM Sigurbjörn Björnsson (3) - SM Stefán Kristjánsson (2,5)
4. Kristján Eðvarðsson (2,5) - AM Björn Þorfinnsson (2,5)
5. Peter Henner (2,5) - Sigurður Páll Steindórsson (2,5)
6. Mikael Jóhann Karlsson (2) - SM Héðinn Steingrímsson (2)
7. AM Bragi Þorfinnsson (2) - Björgvin S. Guðmundsson (2)
8. Michael Grove (2) - FM Guðmundur Gíslason (2)
9. FM Þorsteinn Þorsteinsson (2) - Oliver Aron Jóhannesson (2)
10. KSM Lenka Ptácníková (2) - Tinna Kristín Finnbogadóttir (2)

• Heimasíða mótsins
• Chess-Results
• Beinar útsendingar 
• Myndir frá þriðju umferð (GB)