Gallerý Skák - Lokamót og uppskeruhátíð í kvöld

Vetrarvertíðinni í Gallerý Skák fer senn að ljúka. Þegar degi hallar hittist þar fríður flokkur rótgróinna ástríðuskákmanna og nokkurra yngri og uppvaxandi snillinga til tafls. Lokamótið sem haldið verður með viðhafnarsniði hefst kl. 18.  Er þetta 30 skákkvöldið þar á þessari leiktíð.

Hinir herskáku Gunnarar - Gunnarsson, Birgisson og Skarphéðinsson hafa verið þar einna sigursælastir í vetur ásamt "ungstirninu undraverða" Vigni Vatnari Stefánssyni.  Aðrir fræknir meistarar hafa svo átt sína góðu spretti inn á milli og blandað sér í toppbaráttuna.

Þó farið sé að slá í meðf. mótstöflu frá síðasta móti fyrir hálfum mánuði, sumardagurinn fyrsti setti strik í reikninginn, standa vinningarnir  enn fyrir sínu sérstaklega hjá þeim sem uppskáru eins og þeir sáðu.  Aðrir sitja enn eftir neðar á töflunni með sárt ennið.  En það er huggun harmi gegn að í kvöld  gefst tækifæri á því að jafna reikningana við nokkra "fjandvini" og sýna öðrum í tvo heimana, ef stríðgæfan er mönnum hliðholl. 

 

 

"Látið ekki mögnuð mát úr greipum ganga - né glæstar stöður forgörðum fara - né vesæl peð úr höndum sleppa - nema baneitruð séu"   

Munið að mæta galvaskir og gallharðir til tafls kl. sex . Allir velkomnir /ESE