Fjórtán á Vormóti Vinjar - Skákljónið Róbert vann

Vormót Vinjar, var haldið með glæsibrag fyrr í dag, og má segja að þetta mót marki upphaf að litríku sumar-skákstarfi skákfélags Vinjar.

Halldóra Pálsdóttir, nýjasti starfsmaður Vinjar, lék stórt hlutverk á vormótinu, þó hún beinlínis hafi ekki verið meðal þátttakenda. Hún setti mótið, lék fyrsta leikinn í skák Hrafns Jökulssonar og Sævars Bjarnasonar, og að lokum afhenti hún vinninga í mótslok, og átti lokaræðu mótsins, þar sem hún hvatti alla skákmenn og konur að kíkja sem oftast á skákstarf Vinjar, sannkölluð kjarnakona hún Halldóra.

Lokatölur mótsins urðu þannig að skákljónið Róbert Lagerman lagði alla andstæðinga sína að velli, reynsluboltinn Sævar Bjarnason kom annar í mark, og hinn geðþekki Spánverji Jorge Fonceqa tók bronsið. Í hálfleik buðu þau Hansi yfirkokkur, og Morgan sem er nýjasti sjálfboðaliði Vinjar, upp á alíslenskar vöfflur með rjóma, og heilsuávexti að hætti hússins. Skákfélagið mun halda uppi öflugu skáksumri, í sumar, og hvetjum við alla skákfæra menn og konur að taka þátt í skákveislunni með okkur.

Myndaalbúm (HJ)