Gallerý Skák - Friðrikskóngurinn: Gunnar vann með fullu húsi

Lokamótið í Kappteflinu um FriðriksKónginn fór fram í síðustu viku. Á fjórða tug klókindalegra skákkappa tók þátt í mótaröðinni sem taldi 4 mót. Ekki höfðu þó allir erindi sem erfiði þrátt fyrir djúphugsaðar sóknaraðgerðir, varfærnar forvarnaraðferðir og/eða viðamiklar viðbragðsáætlanir allt eftir atvikum meðan barist var á hvítum reitum og svörtum.   Allir höfðu þó ámælda ánægju af því að tefla og spreyta sig gegn verðugum andstæðingum og skildu sáttir.  Reiðubúnir að endurtaka leikinn við fyrsta tækifæri.  

Á meðan á mótinu stóð var tekin upp skemmtileg heimildamynd í fjórum hlutum af GussFilms Inc. sem Guðfinnur R. Kjartansson gerði með „einari" milli þess að hann tefldi eins og herforingi.  Hana má nú sjá á youtube á þessari slóð: http://youtu.be/PLKDRU0bdLw

Ljóst var áður en sest var að tafli að eðalsjólinn Gunnar I. Birgisson væri búinn að tryggja sér sigurinn í mótaröðinni. Var kominn  með 25 stig að loknum þremur mótum. Hann sló samt ekkert af, bætti um betur og vann glæsilega með fullu húsi. Hlaut 30 stig af 30 mögulegum og var að vonum sigurreifur í mótslok. Fær nafn sitt skráð silfruðu letri á farandgripinn og fagran verðlaunagrip til eignar.   Í öðru sæti varð Friðgeir K. Hólm með 22 og efnispilturinn ungi Vignir Vatnar þriðji með 18. Aðrir uppskáru minna en mikla ánægju engu að síður eins og fyrr sagði. Þrjú bestu mót hvers keppenda töldu til vinningstiga og nánari úrslit má sjá á meðf. mótstöflu og í myndasafni.

 

 

ESE- skákþankar 20.2.13