N1 Reykjavíkurskákmótið: Hjörvar með jafntefli við Wesley So

Fjórir stórmeistarar eru efstir og jafnir á N1 Reykjavíkurskákmótinu að lokinni fjórðu umferð sem fram fór í kvöld í Hörpu. Íslendingarnir Hannes Hlífar Stefánsson og Stefán Kristjánsson fylgja fast á hæla þeirra með 3,5 vinning.

Hjörvar Steinn Grétarsson gerði jafntefli gegn Wesley So frá Filippseyjum, í þungri stöðubaráttuskák i slavneskri vörn. So er 19 ára og þriðji stigahæsti skákmaður heims undir tuttugu ára aldri. Mjög góð úrslit fyrir Hjörvar, sem stefnir að því að klára þriðja og síðasta stórmeistaraáfangann á mótinu.

Friðrik Ólafsson tefldi við þýska skákmeistarann Frank Drill og gerði jafntefli með svörtu í 20 leikjum. Friðrik, sem er 78 ára og fyrsti stórmeistari Íslands, er enn ósigraður á N1 Reykjavíkurmótinu, en hann hefur í þrígang orðið sigurvegari á Reykjavíkurmótinu í 49 ára sögu mótsins. 

Stefán Kristjánsson stórmeistari tefldi afburða vel, þegar hann sigraði norska alþjóðameistarann Andreas Hagen, eftir stórsókn sem endaði með óverjandi máti.

Hannes Hlífar Stefánsson, sigursælasti skákmaðurinn í sögu Reykjavíkurmótanna, gerði jafntefli við kínverska ofurstórmeistarann Bu Xiangzhi, þar sem hvorugur spennti bogann of hátt.

Henrik Danielsen stórmeistari sigraði sigraði Dinöru Sadaukassova frá Kasakstan, þar sem Henrik beitti hinni svokölluðu flóðhestauppstillingu.

Fleiri Íslendingar náðu góðum og áhugaverðum úrslitum. Íslandsmeistari kvenna, Lenka Ptacnikova, gerði jafntefli við enska stórmeistarann Simon Williams. Þá sigraði hin 15 ára Donika Kolica, formaður nemendaráðs Hólabrekkuskóla, skákmann með 500 fleiri skákstig en hún, og Íslandsmeistari barna Vignir Vatnar Stefánsson skellti Inga Tandra Traustasyni, Íslandsmeistara í skákafbrigðinu "Heilinn og höndin".

Þeir skákmenn sem hafa fullt hús eru: Yu Yangyi, Kína, sem stóð sig svo eftirminnalega vel í landskeppninni við Íslendinga, Gajewski, Póllandi, og Vachier-Lagrave, Frakklandi, og Eljanov, Úkraínu. Meðal þeirra sem hafa 3,5 vinning er hinn 13 ára Wei Yi, sem freistar þess að ná lokaáfanga að stórmeistaratitli.

Fimmta umferð fer fram á morgun kl. 16:30. Jóhann Hjartarson verður með skákskýringar sem hefjast upp úr kl. 18.

Í 5. umferð mætast meðal annars Stefán Kristjánsson og Ivan Cheparinov og Hjörvar Steinn og enski stórmeistarinn Jones. Hannes Hlífar mætir stigalágum keppanda og Friðrik Ólafsson glímir við hinn unga og stórefnilega Daða Ómarsson.

• Heimasíða mótsins
• Chess-Results
• Beinar útsendingar
• Myndaalbúm frá fjórðu umferð

Athugasemdir

[Sigurbjörn J. Björnsson (IP-tala skráð) 22.2.2013 kl. 07:53]

Hannes er með 3 vinninga en ekki 3,5 og Hjörvar er með 3,5.

[Þórir Benediktsson (IP-tala skráð) 22.2.2013 kl. 14:09]

Til hamingju með glæsilegt mót og gaman að þessum öfluga fréttaflutningi.  En er ekki íslenska hlutdrægnin orðin fullmikil þegar keppandi með tæp 2400 elo stig er skilgreindur sem "stigalár" .  Vissulega stigalægri en Hannes, munar ca 130 stigum á þeim.