Fjórða umferð í fullum gangi á N1 Reykjavíkurskákmótinu: Margar spennandi skákir

Fjórða umferð N1 Reykjavíkurskákmótsins í Hörpu hófst klukkan 16.30 og má búast við að teflt verði vel fram á kvöld. Margar spennandi skákir eru í gangi, og fylgjast margir með Hjörvari Steini Grétarssyni glíma við Wesley So, snillinginn unga frá Filippseyjum. Báðir hafa þeir fullt hús, eða 3 vinninga.

Friðrik Ólafsson mætir þýska meistaranum Frank Drill; Hannes Hlífar Stefánsson hefur hvítt gegn kínverska ofurstórmeistaranum Bu Xiangzhi og Þröstur Þórhallsson glímir við Gawain Jones, svo aðeins séu nefndar nokkrar af þeim spennandi viðureignum sem nú standa yfir.

Skák dagsins mun trúlega seint líða Ólafi Gísla Jónssyni barnalækni úr minni. Hann situr nú og reynir að verjast sjálfum Ivan Sokolov, sem hlaut slæma byltu í gær. Ólafur Gísli er gamalreyndur skákmaður með 1870 stig, en Sokolov hefur heil 2644. Ólafur tefldi við Friðrik Ólafsson í 1. umferð, svo hann hefur heldur betur verið heppinn með andstæðinga.

Skákskýrinar hefjast um klukkan 19 og eru allir hjartanlega velkomnir í Hörpu.

 

 

• Heimasíða mótsins
• Chess-Results
• Beinar útsendingar