Landskeppnin við Kína hefst í Arion banka í dag klukkan 13: Allir velkomnir

Landskeppni Íslands og Kína í skák hefst í dag klukkan 13, í höfuðstöðvum Arion banka við Borgartún. Mikil tilhlökkun ríkir í báðum liðum, og er búist við fjörlegri taflmennsku og spennandi keppni. Kínversku snillingarnir eru stigahærri, en heimavöllurinn getur reynst Íslendingum drjúgur. Áhorfendur eru velkomnir í Borgartún, og er aðgangur ókeypis.

Teflt er á sex borðum og tefla allir við alla, tvöfalda umferð. Alls verða tefldar 72 skákir og er umhugsunartími 20 mínútur á skák.

Ólafur Ragnar Grímsson forseti Íslands hélt í gær, föstudag, móttöku á Bessastöðum til heiðurs kínversku skákmönnunum. Í ræðu sendiherra Kína, Ma Jisheng, kom fram að Íslendingar og Kínverjar hafa sjö sinnum keppt áður, oftast á Ólympíuskákmótum. Íslendingar hafa unnið 5 sinnum, einu sinni fór jafntefli og einu sinni höfðu Kínverjar sigur.

Kínversku gestirnir verða þó að teljast sigurstranglegir. Lið þeirra er skipað kornungum snillingum, sem unnið hafa til fjölda verðlauna. 

Yngsti liðsmaður þeirra er hinn 13 ára gamli Wei Yi, sem er yngsti alþjóðameistari í heimi og kominn með tvo stórmeistaraáfanga.  Aldursforsetinn er Bu Xiangzhi, 26 ára, sem varð stórmeistari 13 ára og er nú einn af bestu skákmönnum heims.  Ekki verður síður gaman að fylgjast með Yu Yangyi, 19 ára, sem varð stórmeistari 15 ára. Hann er nú þriðji stigahæsti skákmaður Kínverja og gríðarlega efnilegur. Skákdrottningarnar Huang Qian (fædd 1986) og Tan Zhongyi (fædd 1991) eru báðar stórmeistarar kvenna, og hafa unnið til fjölda verðlauna á einstaklingsmótum og með kínverska landsliðinu. Sjötti keppandinn í kínverska liðinu er svo hinn 14 ára gamli Wang Yiye, sem er meðal efnilegustu skákmanna Kínverja.

Mikil breidd er í íslenska liðinu, sem teflir fram fjórum stórmeisturum, auk alþjóðlegra meistara og efnilegra ungmenna. Það er mikið ánægjuefni að Friðrik Ólafsson, fyrsti stórmeistari Íslendinga, skuli tefla með íslenska liðinu. Friðrik er 78 ára og varð stórmeistari í skák árið 1958.

Stórmeistararnir Helgi Ólafsson, Stefán Kristjánsson og Þröstur Þórhallsson, ríkjandi Íslandsmeistari, verða allir með. Auk þeirra eru í hópnum alþjóðameistararnir Hjörvar Steinn Grétarsson, Jón Viktor Gunnarsson og Guðmundur Kjartansson og Lenka Ptácníková, stórmeistari kvenna. Þá munu ungmenni fá að spreyta sig með íslenska liðinu.

Landskeppnin er haldin í tilefni af 60 ára afmæli Kínversk-íslenska menningarfélagsins (KÍM) sem stendur að viðburðinum ásamt Skáksambandi Íslands í samvinnu við Skáksamband Kína, og með stuðningi Arion banka, CCP, Promens, Icelandic og Elkem Íslandi.

 

Áhorfendur eru hjartanlega velkomnir í Arion banka um helgina, til að fylgjast með viðureign Íslands og Kína. Keppni hefst báða daga klukkan 13 og stendur til 17.

 

Myndir frá móttöku forseta Íslands á Bessastöðum.