Riddarinn: Kappteflið um SkákSeglið heldur áfram

Þriðja umferð mótaraðarinnar um SkákSeglið var tefld í gær í hinni skjólgóðu Vonarhöfn að baki kirkjuskipsins við Suðurgötu í Hafnarfirði.  Þar ríkir ævinlega stilla og andleg ró hvílir yfir vötnunum. Þó gætir þar oft þungrar undiröldu ef nánar er skyggnst undir yfirborðið og inn í dýpstu hugarfylgsni keppenda.  

Enginn er annars bróðir í leik  - nema samvaxnir Síamstvíburar séu, sem ekki er til að dreifa hér.  Allir mættir eru í vígahug og enginn jafnteflishugur í mönnum né eru þeir spenntir fyrir því að hlusta á eitthvert innantómt „Lundareykjadalsmálalengingaútúrsnúingaorðagjálfurskjaftæðisþvæluþrætuþras" um friðarumleitanir milli Ísraels- og Palestínumanna eða hernaðaríhlutun í Sýrlandi.  Menn eru ekki hingað komnir til  ræða eilífaðarmálin heldur til að tefla og gleyma öllum vandamálum heimsins og sínum eigin.  

Stríðsástand ríkir á 64 reitum þegar Gussi hefur gefið tóninn með því að klingja mótsbjöllunni til merkis um það að búið sé að para hverja umferðina á fætur annarri og mönnum sé heimilt að leggja upp í herleiðangra til að steypa kóngi hvers annars af stóli. Menn taka hann á orðinu og leitast eftir mætti við að koma mótherjunum í opna skjöldu og verða fyrri til að finna liðsmönnum sínum vænlega reiti og  víghreiður eða skotbyrgi til að verjast árásum.  Skákin er stríðsleikur (a wargame) og því undarlegt að  sjá biskup þarna á vígvellinum miðjum, nóg að hann vaki yfir átökunum eins og sést á  myndunum.  Á því á Páll Jónsson biskup í Skálholti,  (1190-1210) sök og Margrét hin haga, fyrsta nafnkunna myndlistarkona Íslands ef ekki heims, skv. kenningu Guðmundar G. Þórarinssonar,  um mögulegan íslenskan uppruna hinna fornu sögualdartaflmanna, sem kenndir eru við eyjuna Lewis/Ljóðhús.  Sjá: http://leit.is/lewis/  Annars staðar á Norðurlöndum ber þessi tafllmaður heitið „löber"   hlaupari eða njósnari, sem er miklu eðlilegra heiti ef farið er að velta þessu máli  fyrir sér á annað borð.

Nú er annað upp á teningnum en síðast, Einar Ess tapar naumlega fyrir Jóni Þór. Guðfinnur Err  vinnur alla nema þá þrjá efstu.  Ingimar Halldórsson fer fram að miklum krafti þannig að sigurvegarar 2ja undanfarandi móta þeir Sigurður Herlufsen og Jón Þ. Þór mega fara að gæta sín.  Aðrir keppendur eiga misjöfnu gengi að fagna. Svo fer að lokum að Ingimar stendur uppi sem sigurvegari með 10 vinninga af 11 mögulegum, svo að þessir þrír turnar hafa þá allir unnið eitt mót hver.  Þrjú bestu mót hvers keppenda telja til vinningstiga svo úrslitin í mótaröðinni eru enn óráðin.

Staðan er nú þannig að Jón Þ. Þór er með 10+8+6 =24 stig; Sigurður með 3+10+8=21 stig og Ingimar með 8+3+10= 21 stig.  Ef tekið er út lakasta mótið hjá þessum þremur meisturum  er þeir allir jafnir með 18 GrandPrix stig sem þýðir að hver þeirra  sem vinnur síðasta mótið að viku liðinni tryggir sér jafnframt sigur í  keppninni um SkákSeglið 2012.   Gefin eru 10-8-6-5-4-3-2-1 stig fyrir fyrstu 8 sætin eins og í Formúlu 1, svo ef einhver annar verður efstur næst breytir það að sjálfsögðu öllu dæminu.   Spennan verður í algleymingi í lokaumferðinni og ekkert gefið eftir, svo mikið er víst.  Áfram kristmenn krossmenn.

Að öðru leyti vísast til mótstöflunnar hér neðan hvað önnur úrslit varðar.

 

 

ESE - 22.11.12

Myndaalbúm (ESE)