KR: Jón Þ. Þór marði sigur

Það er jafnan mikil spenna í lofti þegar gengið er til tafls í KR-heimilinu á mánudagskvöldum. Stjáni formaður kenndur við KriSt stendur við gluggann og  kallar menn til leiks um leið og þeir eru komnir í sjónfæri á hlaðinu, engan tíma má missa svo orrahríðin geti hafist á tilsettum tíma.  Finnbogi situr við tölvuna og  skráir  menn snarlega inn á keppendalistann og mótsbjallan glymur.

Fyrr en varir er mótið komið í algleyming, hratt leikið og barið á klukkur, eins og SkákOfsi, myndbandið á netinu ber með sér. http://www.youtube.com/watch?v=1rO6f-X4UhQ. Hver umferðin rekur aðra- alls þrettán skákir.   Sjaldan hefur verið svo hart barist og  toppbaráttan verið eins tvísýn og nú.  Eins konar kappaslagur í uppsiglingu.   Kannski fá menn nýjan sigurvegara í kvöld líkt og síðast þegar Sigurður Áss Grétarsson stal senunni.

Hinn sögufróði og gamalreyndi skákmaður Jón Þ. Þór  er mættur til tafls að nýju. Albúinn til þess að gera nokkurt strandhögg í herbúðum KR-inga gefist þess kostur. Tapaði naumlega fyrir Gunna Gunn fyrir hálfum mánuði, hefur síðan verið sigursæll í Riddaranum og Gallerýinu.  Ekkert er útilokað.

Og viti menn það gekk eftir  þrátt fyrir að aldurforsetinn seldi sig dýrt, fylgdi honum eftir eins og skugginn allt mótið.  Jón Þ. Þór marði sigur með minnsta mun - hálfum vinningi.    Stundum vinnast mót á stigum en það er ekki það sama.  Næstur kom hinn sigursæli Sigurður Herlufsen með 10v,  skákmaður sem ber nafn með rentu.  Gunnar Birgisson, þétturávelliogþétturílund,  var jafn honum að vinningum eftir að hafa lagt Guðfinn Err á „kóngsbragði" , hirt af honum kónginn í lokaumferðinni.  Enn það er eins og fyrri daginn , ekki er spurt að vopnaviðskiptum  - aðeins  að leikslokum. 

Nánari úrslit skv. meðf. mótstöflu og á www.kr.is (skák) / ESE 20.11.12