Skákseglið - Sigurður Herlufsen í banastuði

Önnur umferð mótaraðarinnar um Skákseglið, minningarmót Gríms Ársælssonar,  fór fram hjá Riddaranum í gær.  Þó léttleiki og glaðværð svifi yfir vötnunum var ljóst frá byrjun að einbeittur baráttuvilji var til staðar hjá gömlu skákgeggjurunum sem mættir voru til leiks, sumir um langan veg, staðráðnir í því að klekkja á keppinautunum með sannfærandi hætti.  

Að tefla skák minnir oft á fjallaklifur þar sem taka verður vissa áhættu til að ná settu marki. Hættan liggur við hvert fótmál,hvern leik og  ekki hægt að hrósa sigri fyrr en allt er yfirstaðið.  Áhættusækni og öryggi í bland er það sem gerir skákina svona spennandi eða „geggt gaman"  eins og nú er sagt (að sögn Braga Halldórssonar)  

Strax í fyrstu umferð gerðust þau undur og stórmerki að Einar Ess tókst að leggja þrautakónginn sjálfan Jón Þ. Þór að velli með hvítu nokkuð sannfærandi eftir að hann hafði hafnað jafnteflistilboði, og setja þannig óvænt strik í óslitna sigurgöngu hans, en Jón hafði unnið 10 skákir í röð vikuna áður og aðeins gert eitt jafntefli.

Þetta var 91. höfuðleðrið sem Einar krækti sér í á árinu, tíu fleiri en i fyrra og hitteðfyrra. Þrátt fyrir að hann sé manna mistækastur í vinningsstöðum er hann mjög iðinn við kolann og er stundum í „essinu" sínu.    Félagarnir hafa í flimtingum að hann sé haldinn svokallaðri „fyrirvinningsspennu", skákkvíðapersónuleikaspennuhliðrunargeðröskunarkomplex,  sem veldur því að gjörunnar stöður vilja fara  forgörðum og vinningurinn ganga honum slysalega úr greipum, en þó ekki alltaf eins og sjá má á  galleryskak.net og hér  https://sites.google.com/site/ny211011/einar-i-essinu-sinu.

Þetta ásamt öðru varð til þess að Jón átti aðeins undir högg að sækja í mótinu og varð að sætta sig við 2. sætið að þessu sinni á eftir Sigurði A. Herlufsen, stöðubaráttumeistaranum,  sem var í feikna stuði og vann mótið með stæl, hlaut 9½ vinning af 11 mögulegum. Sigurður á það til að beita „borðtennistöktum" þ.e. að leika með hægra megin á taflborðinu með hægri hendinni en með þeirri vinstri vinstra megin, sem er afar sérkennilegt og getur ruglað andstæðinginn í ríminu.  Sigurður E. Kristjánsson, Kínafari, var svo þriðji bestur og virðist vera að ná úr sér flugriðunni. 

Jón Þ. Þór leiðir í stigakeppninni með 18 punkta eftir 2 mót,  Sigurður Herlufsen með 13; Ingimar Halldórsson 11 og Guðfinnur R. Kjartansson með 9.  Úrslitin er þó engan veginn ráðin enn því 3 bestu mót af fjórum telja til vinnings.

Hvað önnur úrslit varðar vísast til mótstöflu og www. riddarinn.is