Atskákmót Íslands 2012. Minningarmót um skákfrömuðinn Sturlu Pétursson (1915 - 1999)

Sturla Pétursson var fæddur í Reykjavík þann 6. september og lést 14. apríl 1999 á 84. aldursári. Hann var sonur Péturs Zoponíassonar ættfæðings og konu hans Guðrúnar Jónsdóttur. Sturla var yngstur af stórum systkinahópi sem öll fæddust á fyrsta fjórðungi síðustu aldar. Sturla lauk gagnfræðaprófi og vann við verslunar-og skrifstofustörf m.a. hjá Reykjavíkurborg, Skattstofunni og Hagstofunni.

Seinni starfsár sín vann hann hjá Rafmagnsveitu Reykjavíkur. Sturla kvæntist Steinunni (Gógó) Hermannsdóttur og eignuðust þau fjögur börn. Sonur þeirra Pétur Rúnar er faðir Sturlu alnafna afa síns sem rekur Gúmmívinnustofuna í Skipholti. Sturla yngri hefur lengi haft áhuga að halda á lofti nafni afa síns innan skákhreyfingarinnar og sem Grafarvogsbúi leitaði hann til skákdeildar Fjölnis þeirra erinda.

Atskákmót Íslands 2012 í minningu Sturlu Péturssonar er afrakstur þessa samstarfs og gefur Gúmmívinnustofan alla vinninga til mótsins sem eru tvöfalt hærri að upphæð en síðustu árin. Margir íslenskir skákmenn muna vel eftir Sturlu Péturssyni sem var mjög góður skákmaður og formaður Taflfélags Reykjavíkur árin 1947 - 1948. Sturla tefldi með íslenska landsliðinu, var ritstjóri skákblaðs og kenndi ungum skákmönnum. Skákdeild Fjölnis er það mikill heiður að standa fyrir og skipulegja skákmót tileinkuðu nafni Sturlu Péturssonar. Skákdeild Fjölnis þakkar Gúmmívinnustofunni og Sturlu Péturssyni framkvæmdarstjóra fyrir ánægjulegt samstarf og stuðning við Atskákmót Íslands 2012. Vonandi sjáum við sem flesta skrá sig af hinum grjóthörðu skáköðlingum sem tefldu árum saman við Sturlu og nutu félagsskapar hans við skákborðið. 

• Skráning fer fram hér á Skák.is
• Ýmsar upplýsingar um mótið má nálgast á Facebook.
• Upplýsingar um þegar skráða keppendur má finna hér.