KR: Sigurður Áss Grétarsson "stal" sigrinum

Þar mættust stálin stinn"  segir allt sem segja þarf um atganginn í KR-heimilinu á Meistaravöllum á mánudagskvöldið var þar sem rammefldir rummungar reitaða borðsins tóku sína vikulegu rimmu og þreyttu með sér 13 hraðskákir áður en yfir lauk og upp var staðið.  Þrekraun sem ekki er heiglum hent og vekur undrun erlendra gesta.  Samt blés aldurforsetinn Gunnar Kr. Gunnarsson vart úr nös eftir allan hamaganginn.  

Gunni Gunn hefur unnið 3 undanfarin mót af öryggi með 11-10½ vinningi

 en varð nú að játa sig óvænt sigraðan fyrir nýjum spútnik af Áss ætt, Sigurði Grétarssyni sem  marði af honum sigurinn á stigum á marklínunni. Sigurður laut þó í lægra haldi fyrir Gunnari í þeirra innbyrðis viðureign sem var viss huggun harmi gegn en engu að síður var sá gamli var alveg gáttaður á þessum reiknireglum.

 Báðir uppskáru þeir 11 vinninga, sem er að sjálfsögðu afbragðs góður árangur í svona stífu og sterku móti.  Þriðji efstur varð svo hinn skeinuhætti Birgir Berndsen með 10 v. en hann vann 2 mót í síðasta mánuði enda þótt báðir hinir sigursælu Gunnarar væru með, þ.e. títtnefndur Gunni Gunn og  Kópavogsstórveldið Gunnar Birgisson, sem nú er genginn formlega í raðir KR-inga.   

Þó einhverjir hafi kannski ekki velt því mikið fyrir sér hingað til er hinn ljóti löstur „einelti" sennilega fylgifiskur skákarinnar eða „mannskemmandieineltispersónuleikastríðnisröskum", sem svo gæti kallast á stofnanamáli.   Á taflborðinu gangast menn nefnilega upp í því og  keppast við sem mest þeir geta við að leggja kóng hvors annars í einelti og  eru sífellt að abbast upp á drottningu andstæðingsins og alla aðra liðsmenn hans og leggja fyrir þá banvænar gildrur.   Reyna að hrekkja og hvekkja mótherjann og gera liði hans allt mögulegt til miska. Ljótt til afspurnar myndi einhver segja - þó ekki Helgi skólameistari.  Því þannig geta ungir sem aldnir fengið  útrás fyrir þennan leiða löst og látið vera að fremja hann annars staðar.  

 

 

Meira á www. kr.is (skák) 

ESE 13.11.12