EM ungmenna: Endaspretturinn hafinn

Þá er endaspretturinn hafinn hér í Prag. Þetta er skrifað á fimmtudagskvöldi að lokinni sjöundu umferð. Vel hefur gengið í síðustu þremur umferðum og 10 vinningar af 15 komið í hús. Þar skiptir mestu máli að Jón Kristinn og Oliver hafa báðir unnið þrjár skákir í röð. Jón vann geysi flottan sigur í dag á mun stigahærri skákmanni. Oliver er sannarlega kominn í gang og gæti náð góðu sæti haldi hann svona áfram. Hilmir Freyr vann gríðarlegan baráttusigur í gær eftir að hafa haft tapað tafl, en lagði of mikið á stöðuna í dag og tapaði í flókinni skák. Vignir vann flottan sigur í gær en tapaði í dag fyrir sterkum Rússa sem tefldi hratt og mjög vel, hálfgerð vél sýndist mér. Dagur hefur byggt upp ágætar stöður gegn stigahærri andstæðingum en ekki fengið nóg út úr þeim, en hann vann þó nokkuð auðveldan sigur í dag. Góður andi ríkir milli drengjanna sem grípa í spil allir saman þegar þeir eru ekki að tefla, hafa allir verið til fyrirmyndar utan borðsins.

Í kvöld fórum ég og Áróra Hrönn, móðir Hilmis Freys, í stutt hóf hjá borgarstjóra Prag. Sérstaklega falleg bygging eins og þær eru flestar í miðborg Prag, án efa margir af fyrrum leiðtogum ríkja Evrópu setið kvöldverð í salnum þar sem hófið fór fram. Þetta var svona hefðbundið hóf, vel mætt af liðsstjórum en tveimur aðilum var boðið frá hverju landi. Mikið um ræður og þakkir. Gaf mig á tal við Kobalia sem er rússneskur stórmeistari með sc. 2650 ELO og yfirþjálfari Rússa á mótinu. Rússar eru með fjölmennan hóp á mótinu og marga sterka keppendur. Ræddi við hann um hvernig skákmálum Rússlands er háttað hjá ungu kynslóðinni. Hann taldi að skák væri kennd í grunnskólum í um 20% ríkja Rússlands, sem er jú sambandsríki. Kobalia var ákaflega hress og gaman að spjalla við hann. Hann hefur aldrei teflt á Íslandi en var áhugasamur um Reykjavíkurskákmótið. Í morgun ræddi ég einnig smá við Armenann Minasian. Armenar eru smáþjóð, aðeins um 3 milljónir og eiga geysisterkt landslið sem varð Ólympíumeistari 2006 og 2008. Hann sagði mér aðeins frá skákkennslunni í armenska skólakerfinu en skák er kennd í öllum skólum landsins.

Rússar eru áberandi í efstu sætum á mótinu, enda sagði Kobalia þá vera komnir hingað til að vinna alla flokka. Rússar eru sennilega ennþá sterkasta skákþjóð heims þrátt fyrir að þeir hafi ekki náð að vinna ÓL síðan að Kasparov hætti eða í Bled 2002. Ef til vill vantar liðsandann hjá þeirra sterkustu mönnum, en ég tók eftir því í morgunmatnum hvað var gaman hjá armensku þjálfurunum sem sátu saman, virtust allir saman vera miklir félagar. Slíkt er auðvitað lykilatriði hjá landsliði í hvaða íþrótt sem er í öllum flokkum.

Nú er það endaspretturinn, síðustu tvær umferðirnar. Þetta hefur gengið ágætlega hingað til hjá drengjunum; enginn að skara fram úr en enginn sem hefur átt mjög slæmt mót. Svona mót eru gríðarlegur skóli fyrir þá sem það sækja, hér er stúderað, teflt og fylgst með skákum nær allan daginn. Nákvæm vinningatala eða sæti skiptir því ekki öllu máli í svona móti, þó það sé jú markmiðið hvers og eins að enda sem efst. Það er ferðin sjálf og öll reynslan sem fylgir henni sem er svo mikilvæg, og mikilvægt að okkar sterkustu ungmenni kynnist þessu umhverfi sem oftast þannig að Íslandi haldi áfram að eignast afreksmenn í skák og þar með sterkt landslið.

Vachlav á kaffinu hefur slökkt ljósin, og það þýðir svefn fyrir SSB.

Stefán Bergsson

• Heimasíða mótsins
• Chess-Results
• Myndaalbúm (ÁHS)