EM í Prag: dagur 2 - pistill frá Stefáni Bergssyni

 

Þegar þetta er ritað er um klukkutímí í aðra umferð. Fyrsta umferðin fór ágætlega. Vignir vann nokkuð örugglega eftir að hafa tekið óþarfa áhættu í byrjuninni, en hann er seigur varnarskákmaður og eftir að hafa hrundið sókn Skotans var hann með mun betri stöðu. Góður sigur hjá Vigni sem teflir í dag gegn Rússa.

 

Hilmir Freyr tefldi 4 tíma baráttuskák gegn Rússa með tæp 2000 stig. Snemma tafls fór Hilmir út úr byrjuninni og lék h5 sem hann fylgdi eftir með Rg4 og geymdi kónginn á f8. Hann hélt sókninni áfram og sá hver er vildi að Rússinn var orðinn mjög stressaður. Hann lék þó nákvæmum varnarleikjum og var staðan lengi afar dýnamísk. Í tímahraki beggja áttaði Hilmir sig á því að á EM er greint á milli manna og drengja, dúndraði sér á hlýrabolinn og bombaði e4-e3 á Rússann; lék peðinu ofan í þrælvaldaðan reit og opnaði fyrir biskup á b7. Áfram hélt Hilmir að hóta og pressa og að lokum þrálék Rússinn í stöðu sem var eitthvað betri á hann, en hann hafði fengið nóg af eilífum hótunum svarts, hristi höfuðið og gekk í burtu. Frábært jafntefli hjá Hilmi og bestu úrslit 1. umferðar.  Hilmir fær í dag stigahæsta keppanda flokksins og er nokkuð vel undirbúinn fyrir nimzo-inverska vörn, en fjölmargar skákir eru í beisnum með þessum Grikkja.

Jón Kristinn tefldi með hvítu gegn mun stigahærri Pólverja og drap of snemma tafls á d5 í slavneskri vörn. Svartur fékk betra nokkuð snemma og kláraði með laglegri fléttu. Eftir skákina fórum við Jón yfir hana og ræddum um að það væri ekki endilega svo gott að drepa á d5 með hvítu í slavneskri vörn.

Oliver tefldi mjög vel framan af í gær gegn Dananum, og fékk í raun unnið tafl. Daninn barðist þó vel og eftir 2 slæma leiki hjá Oliver var staðan orðin jöfn og þráleikið í stöðu sem erfitt var að komast í gegnum. Við Oliver fórum vel yfir það eftir skákina að í svona stöðum þar sem nóg er af tíma á borðinu, snýst leiðin að sigrinum mikið um að laga kallana sína og hafa ákveðið tak á stöðunni, Oliver flýtti sér hins vegar of mikið sem gaf andstæðingnum gagnfæri sem hann nýtti sér.

Dagur tefldi gegn gríðar sterkum Króata með 2200 stig. Dagur barðist vel og hafði sín færi, en smá ónákvæmni í miðtaflinu gaf Króatanum alla stöðuna. Engu að síður fín skák gegn sterkum andstæðing.

Í dag tefla drengirnir allir gegn sterkum andstæðingum en eru vel undirbúnir og munu berjast, það er ljóst.

--------------------------------------------------------------------------------------------------------------------------------------

Sunnudagsmorgun (dagur 3):

Gærdagurinn fór ágætlega; góðir sigrar hjá Vigni og Degi gegn mun stigahærri andstæðingum. Sérstaklega var gaman að fylgjast með Degi yfirspila andstæðing sinn í miðtaflinu. Vignir vann skákina á sínum styrkleikum, var þolinmóður í miðtaflinu, passaði sig á hættum andstæðingsins og vann hann svo í endataflinu. Jón Kristinn og Oliver áttu báðir slæmar dag, en þó ber að hrósa Jóni fyrir mikla baráttu og var hann ekki langt frá jafntefli. Oliver barðist einnig fram í rauðan dauðann. Hilmir Freyr fór of geyst í sókn gegn stigahæsta andstæðingnum sem nýtti sér það um leið. Mjög sterkur þessi 12ára Grikki sem hefur í sumar verið að leggja nokkra FM og IM í sterkum mótum.

Ég er nokkuð ánægður með hópinn að loknum þessum fyrstu 2 umferðum. Menn eru að leggja sig fram og berjast, bera enga virðingu fyrir stigahærri andstæðingum.

Þriðja umferðin hefst á eftir klukkan þrjú. Hér er glampandi sól og hópurinn á leið í tennis áður en stúderingar hefjast.

Mig langar að lokum að þakka öllum sem komu að Skákhátíð Skákakademíunnar á Menningarnótt. Svakalega gaman að skoða myndirnar.

Stefán Bergsson.