Spennandi Bónuseinvígi framundan: Hvað gerir Hjörvar gegn Jóhanni eftir þjálfun hjá Sokolov?

Jóhann Hjartarson og Hjörvar Steinn Grétarsson mætast í Bónus-einvíginu í skáktjaldinu á Lækjartorgi á Menningarnótt. Einvígið hefst klukkan 17 og verður án efa mjög spennandi. Jóhann er stigahæsti meistari íslenskrar skáksögu en Hjörvar Steinn er 19 ára landsliðsmaður, sem vantar aðeins einn áfanga til að landa stórmeistaratitli.

Hjörvar Steinn hefur undanfarið verið í þjálfunarbúðum hjá sjálfum Ivan Sokolov, sem um árabil hefur verið meðal sterkustu skákmanna heims, og unnið marga frækna sigra á Íslandi. Hjörvar hlakkar til einvígisins við Jóhann og segir:

,,Ég get ekki sagt annað en að ég sé mjög spenntur að fá að tefla einvígi við einn besta  skákmann okkar Íslendinga frá upphafi. Virðing mín fyrir honum verður engu að síður sett til hliðar á meðan einvíginu stendur."

Jóhann sló á létta strengi og vísaði til þess að Bónus leggur til rausnarlega vinninga í formi inneignarkorta:

,,Ekki verra að þurfa ekki að svelta næstu vikurnar þótt allt annað fari til fjandans! Verst að maður ræður líklegast ekkert við strákinn eftir þjálfunina hjá Ivan."

Jóhann og Hjörvar Steinn tefla 4 skákir. Umhugsunartími er 5 mínútur, auk 3 sek. viðbótartíma fyrir hvern leik. Einvígið er einn af mörgum viðburðum sem Skákakademían efnir til í Skáktjaldinu á Lækjartorgi á Menningarnótt. Dagskráin hefst klukkan 12 og stendur í 8 klukkustundir.