EM ungmenna hafið: Stefán Bergsson skrifar frá Prag

Þegar þetta er ritað er rúmur klukkutími liðinn af fyrstu umferð á Evrópumóti ungmenna sem haldið er í Prag. Við Íslendingar eigum fimm fulltrúa á mótinu; Vignir Vatnar teflir í u10, Hilmir Freyr Heimisson u12, Jón Kristinn Þorgeirsson og Oliver Aron í u14 og Dagur Ragnarsson í u16. María, Stefán Már og Áróra fylgja svo sínum drengjum þeim Jóni, Vigni og Hilmi.

Ferðin frá Keflavík til Prag gekk vel, en hópurinn var þó  ansi ansi feginn í gærkveldi að komast loksins á hótelið eftir langa bið í Kaupmannahöfn. Vel var tekið á móti hópnum en þó þurfti ég að stíga fast til jarðar í nokkrum praktískum álitamálum. Hef lært það af GM Helga Ólafssyni að það dugir enga linkind gagnvart austanblokkinni. Hotel Praha er risastórt, sennilega byggt fyrir einhverjum áratugum og skemmtilega  a-evrópskur íburður prýðir hýbýlin, fyrir utan herbergin, sem eru eins og af gamalli sovéskri heimavist. Hópurinn fékk allur herbergi á sama gangi sem er mikilvægt á svo stóru hóteli. Sem dæmi um stærðina er um 3-4 mínútna ferð að fara frá herbergjunum í keppnissalina. Salirnir eru þrír og tefla Vignir og Hilmir í sama salnum, sem og Jón Kristinn og Oliver og Dagur svo einn Íslendinga í þeim þriðja. Aðstaða keppenda er gríðargóð, gott pláss milli borða, góðir stólar og góð lýsing. Aðrir en liðsstjórar, keppendur og skákstjórar fá ekki að fara inn í salinn nema fyrstu tíu mínúturnar til að taka myndir. Í sölunum eru því nær einungis keppendur og mjög gott hljóð; eitthvað sem má athuga á helstu barnamótum á Íslandi.

Við munum borða á sama  veitingarstaðnum hér á hótelinu, og í raun ekki mikill tími til að fara af því. Hér er allt til alls og þegar ekki er teflt er mikilvægt að eyða tímanum í hvíld og undirbúning fyrir skákirnar. Pörun birtist um 10 á kvöldin og mun undirbúningur með strákunum fara fram frá miðjum morgni fram að umferð. Það verður þó mismikið hvað hver stúderar fyrir hverja umferð, enda mismargar skákir með andstæðingunum aðgengilegar, Rússinn sem Hilmir er að tefla við á t.d. engar skákir í beisnum.

Mótið er það fjölmennasta frá upphafi EM ungmenna og eiga Tékkarnir hrós skilið fyrir skipulagið. Ég tók sérstaklega eftir ákveðnu handapatssystemi hjá skákstjórunum þegar umferðin hófst; greinilega vel æft hvernig þeir létu hvorn annan vita af því að allir væru sestir, en hér gildir zero-tolerance rule, sem þýðir að keppandi tapi sé hann ekki mættur við upphaf skákar. Ég veit ekki til þess að neinn hafi tapað þannig í þessari 1. umferð.

Á svona mótum er gríðar mikilvægt að halda góðri rútínu, huga að reglulegum svefni og passlegri hreyfingu. Á morgun verður gönguferð um morguninn og kíkt í líkamsræktina og sundlaugina. Einnig skiptir máli að hvíla sig frá skák í stundarkorn og eru kvöldin frjáls fyrir drengina eftir að þeir hafa farið yfir skákir sínar.