,,Heilinn og höndin" á Menningarnótt: Skráið ykkur sem fyrst

Skákakademían býður til margrétta veislu á Lækjartorgi á Menningarnótt. Dagskráin hefst klukkan 12 á laugardaginn og stendur í 8 klukkutíma. Einn af hátpunktum dagsins er fyrsta meistaramótið í Heilinn og höndin, sem er ákaflega skemmtilegt og spennandi keppnisform.

Reglurnar eru einfaldar:

Tveir keppendur eru saman í liði og má samanlögð stigatala þeirra ekki fara yfir 4300 stig.

Fyrir hverja viðureign tilkynna keppendur hvor er ,,heili" og ,,hönd". Heilinn mælir fyrir um hvaða gerð af taflmanni á að hreyfa (til dæmis peð, riddara, kóng). Stranglega er bannað að tiltaka HVAÐA mann á að hreyfa og keppendur mega EKKERT samráð hafa. Höndin velur leikinn og ýtir á klukkuna.

Mótið hefst klukkan 15:30 á laugardag og eru keppendur hvattir til að skrá sig sem fyrst hjá Birni Ívari Karlssyni skákstjóra í [e-mail]. Tíu lið munu keppa á mótinu og verða tefldar 5 umferðir.