Skákveisla á Lækjartorgi á Menningarnótt

Skákakademían býður til veislu á Lækjartorgi á Menningarnótt, nk. laugardag, þar sem hver viðburðurinn rekur annan í 8 tíma fjölbreyttri dagskrá. Slegið verður upp tjaldi á torginu, þar sem boðið verður upp á kleinur og kakó.

Dagskráin á laugardaginn hefst á því að Helgi Ólafsson stórmeistari teflir klukkufjöltefli við íslenska kvennalandsliðið, sem undirbýr sig nú fyrir Ólympíumótið í Tyrklandi sem hefst síðar í mánuðinum.

Þá verður efnt til II. Alheimsmótsins í leifturskák, en fyrsta mótið fór fram á Menningarnótt í fyrra og vakti mikla lukku. Þá er umhugsunartími keppenda aðeins 1 mínúta, og því mikill handagangur í öskjunni.

Hjörvar Steinn Grétarsson landsliðsmaður mun tefla fjöltefli við gesti og gangandi, og krakkarnir í Úrvalsliði Skákakademíunnar skora á alla sem þora!

Þá verður nú efnt til fyrsta opinbera mótsins í nýju og æsispennandi keppnisformi, sem kalllað er ,,Heilinn og höndin". Tveir keppendur eru saman í liði og má samanlögð stigatala þeirra ekki fara yfir 4300 stig.  Heilinn mælir fyrir um hvaða gerð af taflmanni á að hreyfa (til dæmis peð, riddara, kóng). Stranglega er bannað að tiltaka HVAÐA mann á að hreyfa og keppendur mega EKKERT samráð hafa. Höndin velur leikinn og ýtir á klukkuna.

Margt fleira verður á dagskránni í skáktjaldinu á Lækjartorgi og verður m.a. dregið um töfluröð á Íslandsmóti skákfélaga.

Skákakademían vonast til að sjá sem allra flesta skákáhugamenn á öllum aldri, enda frábært að skákgyðjan skuli verða í miðpunkti hátíðahaldanna á Menningarnótt.