Landsmót UMFÍ 50+: Erlingur Þorsteinsson sigraði

Það svífur sannkallaður keppnisandi yfir vötnunum við Varmá í Mosfellssveit þar sem Landsmót UMFÍ fyrir 50 ára og eldri fer fram núna um helgina undir bláhvítum fána.

Keppt er í fjölmörgum greinum, þar á meðal hugaríþróttum eins og bridge og skák.  Landmót með þessu sniði er nú haldið í annað sinn. Fyrir 2 árum fór það fram á Hvammstanga en þá voru keppendur í skákmótinu aðeins 5 talsins.  Nú voru þeir sextán og keppnin einstaklega lífleg og skemmtileg og einbeitnin skein úr hverju andliti, líka áhorfenda. 

Aðstæður voru hinar bestu, teflt í bókasafnsal Varmárskóla. Mótið fór einkar vel og skipulega  fram, en  RIDDARINN - skákklúbbur eldri borgara á höfuðborgarsvæðinu,  hafði tekið að sér að annast framkvæmd þess.   Tefldar voru 9 umferðir með 10 mín. umhugsunartíma á skákina.   Mótið var helgað minningu Pálma S. Gíslasonar, fv. formanns UMFÍ og UMF Kjalnesinga,  sem var skák- , íþróttamaður og drengur góður, en féll frá langt um aldur fram.

Eftir tvísýna baráttu framan af móti seig  hin eitilharði og góðkunni skákmaður Erlingur Þorsteinsson, UMF Fjölni, fram öðrum keppendum og sigraði glæsilega með 8 vinningum af 9 mögulegum.  Í öðru sæti varð hinn valinkunni Áskell Örn Kárason,  UMFA, sigurvegarinn frá því í hitteðfyrra.  Þriðji varð svo stöðubaráttujaxlinn Þór Valtýsson, UMFA með 6 vinninga og hálfu stigi meira en Ragnar Hermannsson, UMF Fjölni,  sem var jafn honum að vinningum.

Verðlaunaafhendingu önnuðust þeir Einar Kr. Jónsson, stjórnarmaður UMFÍ og Svanur Gestsson, UMSK, sem einnig aðstoðaði  við mótshaldið.  Einar S. Einarsson, var skákstjóri.

Myndaalbúm (ESE)