Hjörvar með jafntefli við Baklan - Þorsteinn einnig með jafntefli

Alþjóðlegi meistarinn Hjörvar Steinn Grétarsson (2477) gerði jafntefli við stigahæsta keppenda mótsins, úkraínska stórmeistarann Vladimir Baklan (2612), í sjöundu umferð alþjóðlega mótsinsí Val Gardena sem fram fór í dag.   Hjörvar hefur 5 vinninga og er í 2.-7. sæti.  

Þorsteinn Þorsteinsson (2248) heldur einnig áfram að ná góðum úrslitum gegn stigahærri skákmönnum.  Í dag gerði hann jafntefli við ítalska FIDE-meistarann Alaxande Bertagnolli (2370).  Þorsteinn hefur 4 vinninga og er í 15.-25. sæti.

Argentíski stórmeistarinn Fernando Peralta (2590) er efstur með 6 vinninga, vinningsforskot á Hjörvar og fleiri. 

Í áttundu og næstsíðustu umferð, sem fram fer á morgun, teflir Hjörvar við rússneska stórmeistarann, Evgeny Gleizerov (2570).   Þorsteinn mætir ítalska FIDE-meistarann Federico Manca (2424). 

56 skákmenn frá 19 löndum taka þátt í þessu móti og þar af eru 14 stórmeistarar og 9 alþjóðlegir meistarar.  Hjörvar er nr. 13 í stigaröð keppenda en Þorsteinn er nr. 28.  

Allar skákir mótsins eru sýndar beint og hefjast umferðir kl. 13.  

• Heimasíða mótsins
• Myndaalbúm (GF)
• Úrslitaþjónusta
• Beinar útendingar (hefjast kl. 13 nema síðasta umferðin kl. 7)