Stefán Bergsson sigraði í Mosó

Það voru sjö skákíþróttamenn sem tókust á í móti hjá Kjósarsýsludeild Rauða krossins í Mosfellsbæ í gær, strax upp upp úr hádeginu. Skákfélag Vinjar mætti í heimsókn og eitthvað voru innfæddir uppteknir, nú eða syfjaðir, því þeirra var sárt saknað.

Þrír Jónar voru mættir þannig að auðvitað tefldu allir við alla, eða öll við öll, á Jónamótinu. Jón Birgir Einarsson stóð sig langbest Jóna og varð annar með  5 vinninga, hálfum á eftir Stefáni Bergssyni og sá eini sem náði jafntefli við sigurvegarann.

Haukur Halldórsson var ákveðinn og náði bronsinu með 4 vinninga.

Það er afar huggulegt að tefla í húsnæði Kjósarsýsludeildar, vel tekið á móti mannskapnum og klárlega pláss fyrir miklu fleiri en sjö. Mosfellingar sem tóku þátt í deildarmótinu í vetur hafa nýtt sér aðstöðuna til æfinga í vetur svo þarna eiga eftir að verða fjölmennari mót í framtíðinni.