Bobby Fischer kemur heim: Útgáfuhóf í Iðnó í hádegi á föstudag

Helgi Ólafsson stórmeistari í skák og náinn vinur Bobby Fischer heimsmeistara í skák hefur sent frá sér bók um kynni sín af bandaríska snillingnum sem varð íslenskur ríkisborgari og dó í Reykjavík fyrir fjórum árum. Útgáfu bókar Helga verður fagnað í Iðnó föstudaginn 4. maí, milli klukkan 12 og 13.

Bobby Fischer comes home - The Final Years in Iceland, a Saga of Friendship and Lost Illusions er heiti bókarinnar sem hollenska útgáfufyrirtækið New in Chess hefur gefið út eftir Helga Ólafsson. Bókin fjallar um síðustu ár Bobby Fischers á Íslandi en hann lést í ársbyrjun 2008.

Helgi Ólafsson, sem sex sinnum hampaði Íslandsmeistaratitlinum í skák, tók virkan þátt í baráttunni fyrir lausn Fischers úr japönsku fangelsi og kynntist heimsmeistaranum vel eftir að Fischer kom til Reykjavíkur sem íslenskur ríkisborgari í mars 2005.

Helgi fjallar ennfremur um feril Fischers á árunum kringum 1970 og leitast við að fanga stemmningu ,,einvígis aldarinnar" sem fram fór í Laugardalshöll sumarið 1972 og vakti heimsathygli en þar lagði Fischer Boris Spasskí að velli, varð heimsmeistari og rauf þar áratuga einokun Sovétmanna á skáksviðinu. Ýmsar kunnar persónur koma við sögu í bók Helga, og atburðir Íslandssögunnar, t.a.m.eldgosið í Vestmannaeyjum 1973, fléttast inn i frásögnina. Eftir standa nokkrar áleitnar spurningar um líf þessa sérstæða manns sem afsalaði sér bandarísku ríkisfangi og dó íslenskur ríkisborgari.

Skáksamband Íslands og Skákakademía Reykjavíkur standa í sameiningu að útgáfuhófinu í Iðnó. Gunnar Björnsson forseti SÍ stjórnar þinginu en setningarávarp flytur Guðni Ágústsson fv. ráðherra, sem m.a. hefur beitt sér fyrir því að skáksetur verði sett á laggirnar til að minnast einvígis aldarinnar á Íslandi. Helgi Ólafsson mun segja frá tilurð bókarinnar og kynnum sínum af Bobby Fischer, sem að margra áliti er sterkasti skákmaður allra tíma.

Boðið verður uppá ljúffenga súpu og brauð fyrir 1400 krónur. Gestir eru hvattir til að mæta tímanlega.

Athugasemdir

[Vilhjálmur Örn Vilhjálmsson, 3.5.2012 kl. 03:50]

Ég hlakka til að sjá kaflann um gyðingahatur (sjálfhatur) Fischers, sem litaði nú mest hans síðustu ár í Japan og á Íslandi. Það hlýtur því að vera stór kafli ef bók þessi á að hafa einhvern trúverðugleika sagnfræðilega séð.

Fischer hélt úti síðu í Japan með hjálp konunnar sem fékk alla peningana hans, þar sem ósómanum var dælt út. Ríkissaksóknari neitaði að lögsækja manninn, þótt heimildir væru fyrir því í lögum!

Simon Wiesenthal Center var sagt að fara norður og niður þegar þeir gerðu athugasemdir við að Fischer fengi óáreittur að spreða sora huga síns, sem hafði heltekið hann, í stað leikja og staða í hinum göfuga leik sem skáklistin er.

Nú er að sjá hvort bók Helga er sagnfræðirit eða lofsöngur?

Rétt er það ekki að hann hafi afsalað sér Bandarískum ríkisborgararétti. Hann tók íslenskan, eftir að vegabréf hans bandarískt hafði verið afturkallað og hann var eftirlýstur í BNA.

[Torfi Stefánsson (IP-tala skráð) 3.5.2012 kl. 08:29]

Ég held nú að það sé einfaldara og nær efninu að spyrja um "vináttu" þessara tveggja manna.

Mig minnir nú að Helgi hafi verið einn af þeim sem lentu upp á kant við Fischer og sem sá gamli vildi ekkert með hafa.

Garðar Serrisson er því miður ekki lengur til frásagnar um það.

Vonandi er ekki annað í þessari bók í samræmi við þessa "sögu um vináttu"!

[Páll (IP-tala skráð) 3.5.2012 kl. 09:19]

Torfi,

hvað áttu við með

,,Garðar Sverrisson er því miður ekki lengur til frásagnar um það" ??

Ég held að hann hljóti að vera til frásagnar um það sem honum finnst frásagnarvert.

Rétt eins og þú sjálfur.  

[Vilhjálmur Örn Vilhjálmsson, 5.5.2012 kl. 08:04]

Til upplýsingar

http://postdoc.blog.is/blog/postdoc/entry/1238096/