NM stúlkur 2012 - Pistill fjórðu umferðar - Hrund og Jóhanna efstar í sínum flokkum

Fjórða umferð Norðurlandamóts stúlkna er rétt nýlokið.  Íslensku keppendurnir áttu fremur góðan dag og skiluðu fjórum og hálfum vinningi í hús af sex mögulegum.  Ekki vantaði mikið á að enn fleiri vinningar fengjust.

A-flokkur:
Jóhanna Björg Jóhannsdóttir – Amalie Heiring Lindestrom 1-0
Louise Segerfelt -  Sigríður Björg Helgadóttir 0-1

Andstæðingur Jóhönnu tefldi byrjunina ekki mjög vel og því fékk Jóhanna strax rýmri og þægilegri stöðu.  Eftir að hafa unnið peð kláraði Jóhanna skákina örugglega í endataflinu.  Jóhanna er nú komin í fyrsta til þriðja sæti í þessum flokki.

Sigríður rændi peði fljótlega í byrjuninni og fékk frekar þrönga stöðu í staðinn.  Hún tefldi framhaldið hins vegar mjög vel og uppskar fínan sigur.  Sigur í síðustu umferð skilar henni verðlaunasæti.

Eftir fjórar umferðir er Jóhanna í fyrsta til þriðja sæti og þarf nauðsynlega að vinna í síðustu umferð (þrjár efstu eru allar búnar að tefla saman) til að eiga sigurmöguleika. 

B-flokkur:
Hrund Hauksdóttir – Marte B Kyrkebö 1-0
Alise Haukenes – Veronika Steinunn Magnúsdóttir 0-1

Hrund, afmælisbarn dagsins, heldur áfram að tefla vel.  Eins og hægt var að fylgjast með í beinni útsendingu þá hafði Hrund tögl og haldir í skákinni allan tíman og landaði öruggum sigri.  Hún er nú ein efst í flokknum.

Veronika er einnig að tefla mjög vel í þessum flokki og er eina tap hennar gegn Hrund.  Veronika tefldi mjög vandað í dag sem endaði með því að andstæðingur hennar lék illa af sér manni í stöðu þar sem Veronika stóð mun betur.  Veronika kláraði skákina af öryggi.

Þær stöllur standa mjög vel í þessum flokki.  Hrund er ein efst með þrjá og hálfan vinning af fjórum mögulegum hálfum vinningi á undan næstu stelpu.  Veronika á mjög góðan séns á verðlaunum með sigri í síðustu umferð því hún er í þriðja til sjötta sæti með tvo og hálfan vinning.

C-flokkur:
Sóley Lind Pálsdóttir – Elisa Sjöttem Jacobsen 0-1
Helene Lorem  – Nansý Davíðsdóttir ½-½

Sóley fékk fína stöðu úr byrjuninni eftir að andstæðingurinn fór í frekar illa ígrundaða sókn.  Sóley varð hins vegar á afdrifarík mistök og í stað þess að fá mun betri stöðu tapaði hún manni og fékk ómögulega stöðu og neyddist til að gefast upp.

Nansý teflfdi mjög vel til að byrja með og fékk mun betri stöðu úr byrjuninni en var aðeins óörugg því henni fannst hún ekki kunna teoríuna nægilega vel.  Ástæðan fyrir því var einföld, andstæðingurinn kunni alls ekki teoríuna og því kom upp staða sem Nansý kannaðist ekki við!  Í stað þess að ganga á lagið og leggja beint til atlögu þá gaf Nansý aðeins eftir, taflið jafnaðist og skákin endaði með jafntefli.

Þær stöllur eru báðar í fjórða til níunda sæti með tvo vinninga og þurfa nauðsynlega að vinna í síðustu umferð til að eiga einhvern séns á verðlaunum.

Fimmta og síðasta umferðin er tefld klukkan 14:30 í dag.

Skákir íslensku stelpnanna í fimmtu umferð:

A-flokkur:
Emilie Ellegaard Christiansen (Danmörk) - Jóhanna Björg Jóhannsdóttir
Sigríður Björg Helgadóttir – Erle Andrea Marki Hansen (Noregur) (í beinni útsendingu)

B-flokkur:
Ina Kraemer (Svíþjóð) - Hrund Hauksdóttir (í beinni útsendingu)
Veronika Steinunn Magnúsdóttir – Rina Weinman (Svíþjóð)

C-flokkur:
Lisa Fredholm (Svíþjóð) - Sóley Lind Pálsdóttir
Nansý Davíðsdóttir – Brandy Paltzer (Svíþjóð)

Mótstöflur, skákir og bein útsending:

Töflur
Bein útsending
Skákir
Umfjöllun skákstjóra (pistlar)

 Davíð Ólafsson