Guðmundur gaf Þjóðminjasafninu taflborð frá einvígi aldarinnar

Þann 13. mars sl. hélt Helgi Ólafsson fyrirlestur um einvígi aldarinnar.  Við það tilefni kvað Guðmundur G. Þórarinsson sér hljóðs og gaf Þjóðminjasafninu að gjöf steinplötu sem smíðuð var í tilefni einvígisins en var þó aldrei notuð.  Höfðingjalegt gert af Guðmundi enda hér um einstakan mun að ræða sem smíðaður var m.a. úr íslensku grjóti og ljóst að slíkir munir eru þjóðargersemar og afar vel til fundið að hafa þá í vörslu Þjóðminjasafnsins.

Í frétt Morgunblaðsins segir:

Guðmundur G. Þórarinsson hefur afhent Þjóðminjasafni Íslands steinborð til varðveislu sem smíðað var í tilefni af„einvígi aldarinnar". Í sumar eru 40 ár liðin frá því að skákeinvígið var háð í Reykjavík, en það vakti gífurlega athygli um allan heim. 

Það var draumur Skáksambands Íslands að teflt skyldi á plötu úr íslensku grjóti. Svörtu reitirnir eru úr gabbrói frá Vestra-Horni, en ekki fannst nógu hvítt íslenskt berg svo hvítu reitirnir eru úr innfluttum marmara. Smíði þessarar plötu vakti þjóðarathygli en hún var aldrei notuð, því Fischer hafnaði því að tefla á borðinu þar sem reitirnir væru of stórir. Platan var smíðuð í Steinsmiðju Sigurðar Helgasonar. Stjórn Skáksambandsins færði Guðmundi borðið að gjöf á sínum tíma fyrir hans mikla starf að einvígishaldinu, sem hann var forsvarsmaður fyrir.  

Taflborðið verður til sýnis í Þjóðminjasafni Íslands frá og með laugardeginum 17. mars á sýningunni „Einvígi aldarinnar. Fischer og Spassky - 40 ár" sem nú stendur í safninu.

Myndirnar tók Einar S. Einarsson.