Áttunda umferð N1 Reykjavíkurskákmótsins: Hvað gerir Sokolov gegn Caruana?

8. umferð N1 Reykjavíkurskákmótsins hófst í Hörpu klukkan 16.30 og stendur í allt að 5 tíma. Fabiano Caruana er einn efstur á mótinu með 6½ vinning af 7 mögulegum. Ítalski meistarinn, sem er aðeins 19 ára, hefur hvítt gegn Ivan Sokolov sem hefur 6 vinninga.

Boris Avrukh frá Ísrael er í 2.-3. sæti ásamt Sokolov. Avrukh hefur hvítt gegn Búlgaranum Ivan Cheparinov sem hefur 5½ vinning.

Heimsmeistarinn Hou Yifan, sem er taplaus á mótinu, teflir við Vladimir Baklan. Nái hún vinningi í dag á hún góða möguleika á sigri á mótinu. Staðan á toppnum er flókin og spennandi, og allmargir skákmenn eiga enn möguleika að ná efsta sætinu.

Bragi Þorfinnsson, sem átt hefur frábært mót, mætir tyrkneska stórmeistaranum Ipatov og Guðmundur Kjartansson mætir enska stórmeistaranum Simon Williams.

Alls eru nú tæplega 100 skákir í gangi á N1 Reykjavíkurskákmótinu í Hörpu.