Hilmir Freyr sigraði á Gagnaveitumótinu - Reykjavík BarnaBlitz 2012

Hilmir Freyr Heimisson, 10 ára, sigraði með glæsibrag á Gagnaveitumótinu - Reykjavík BarnaBlitz. Hann sigraði Nansý Davíðsdóttur í úrslitum með tveimur vinningum gegn engum, eftir að hafa lagt alla keppinauta sína af öryggi á leið í úrslitin.

Gagnaveitumótið - Reykjavík BarnaBlitz er einn af sérviðburðum Skákhátíðar Reykjavíkur, sem nú stendur yfir. Haldin voru úrtökumót í skákfélögunum í höfuðborginni og unnu 8 ungir skákmenn sér rétt til keppni í úrslitum.

Hilmir Freyr tefldi til sigurs í hverri einustu skák og var ávallt einbeitingin uppmáluð. Nansý Davíðsdóttir, sem er Íslandsmeistari barna 2012, tefldi af hugkvæmni og hörku en að þessu sinni hafði hinn harðsnúni Hilmir Freyr sigur, og er verðskuldaður meistari Gagnaveitumótsins - Reykjavík BarnaBlitz 2012.

Óttarr Proppé borgarfulltrúi og stjórnarformaður Skákakademíu Reykjavíkur afhenti hinum ungu meisturum verðlaun við upphaf 5. umferðar N1 Reykjavíkurskákmótsins. Þá færði Stefán Bergsson framkvæmdastjóri Skákakademíu Reykjavíkur krökkunum hamingjukveðjur og þakkaði Gagnaveitunni fyrir stuðning við skáklíf á Íslandi.

Myndir frá úrslitum Gagnaveitumótsins - Reykjavík BarnaBlitz 2012