Skákþáttur Morgunblaðsins: Heimsmeistari kvenna teflir í Hörpu

Þátttaka heimsmeistara kvenna, Hou Yifan, á Reykjavíkurskákmótinu sem hefst í Hörpu á þriðjudaginn er sérstakt ánægjuefni. Á fyrsta Reykjavíkurmótinu sem fram fór árið 1964 var Nona Gaprindhasvili, þá nýbakaður heimsmeistari, meðal þátttakenda og á heimaslóð hennar í Georgíu byggðist upp í kringum hana hópur skák-valkyrja. Hou Yifan, sem er nýorðin 18 ára, kemur fram eftir áratuga sigurgöngu stallsystra sinna frá Kína en sá er munur á henni og Nonu, að á sjöunda áratugnum var gríðarlegur styrkleikamunur á konum og körlum og Nona var sjaldnast í færum með að vinna þá bestu. Á mótinu í Gíbraltar í janúar, þar sem Hou Yifan varð í efsta sæti ásamt Nigel Short og náði árangri sem metinn er uppá 2872 elo-stig, voru helstu fórnarlömb hennar margir af bestu skákmönnum heims: Alexei Shirov, Le Queang, Zoltan Almasi og síðast en ekki síst Judit Polgar en uppgjör þeirra vakti feiknarlega athygli og sigur Hou Yifan markaði ákveðin þáttaskil í skáksögunni. Hún hefur léttan og frísklegan stíl og mikinn sigurvilja til að bera, eins og kom fram í viðreigninni við besta skákmann Vietnam:

Hou Yifan - Le Queang Liem

Sikileyjarvörn

1. e4 c5 2. Rf3 d6 3. d4 cxd4 4. Rxd4 Rf6 5. Rc3 a6 6. f4 e6 7. Be2 Dc7 8. O-O Be7 9. Kh1 O-O 10. a4 Rc6 11. Be3 He8 12. Bf3

Þekkt byrjun úr einvígjum Karpovs og Kasparovs sem alltaf lék 12. .... Hb8.

12. ... Ra5 13. Bf2 Rd7 14. De1 b6 15. e5 Bb7 16. Bg3 dxe5 17. fxe5 Hac8 18. Hd1 Bb4 19. Df2 Hf8 20. Re4! Rxe5 21. Bf4 Bxe4 22. Bxe4 Bd6 23. Rf3?

Peðsfórnin var ágæt en hér var best að leika 23. De2 eða 23. b3.

23. ... f5! 24. Bxe5 Bxe5 25. Bd3 Bxb2 26. Hb1 Bc3 27. Rg5 De7 28. De3 Rc4 29. Bxc4 Hxc4 30. Hxb6 Bd4 31. Dd3 Hxa4 32. Hxe6!

Þó sanna megi að svarta staðan sé betri tekst Hou Yifan alltaf að skapa vandamál í stöðu svarts, 32. ... Dxg5 er nú svarað með 33. Db3! sem hótar hróknum og 34. He8+.

32. .. Da3 33. De2 h6

- sjá stöðumynd 1 -

34. Hxh6! gxh6 35. De6 Kg7 36. Dd7 Kg6 37. Re6 Bc5?

37. ... Hf7 hélt jafntefli. „Houdini" tilkynnir: þvingað mát í 10 leikjum!

38. Dg7+ Kh5 39. Rxf8 Bxf8 40. Df7

- og svartur gafst upp.

Hver er besti leikurinn?

Þessi staða - sjá stöðumynd - kom upp á Norðurlandamóti ungmenna í Finnlandi á dögunum. Hallgerður Helga Þorsteinsdóttir var með svart gegn Finnanum Henri Torrkola og var í miklu tímahraki , lék 44. .... H6h3+ og tapaði eftir45. Kg4. Þetta er mögnuð staða. Hver er besti leikur svarts? „Houdini" bendir á að Hallgerður gat leikið 44. ... Kf7!sem er afar útsmoginn leikur. Eftir 45. a8(D) kemur 45. ... g4+! 46. Kxg4 Hg6+ 46. Kf3 Hxg1! og engin vörn finnst við hótuninni 46. ... Hg3mát. 45. Kg4 lítur betur út en eftir 45. ... H6h4+ 46. Kf5 g4! 47. Haa1 Hf2!! vinnur svartur, t.d. 48. Haf1 Hh5+ 49. Kxg4 Hg5+ og 50. ... Hh2 mát!

Það er aðeins ein vörn í stöðunni eftir 44. ... Kf7, „tölvuleikur" af bestu gerð, 45. Haa1! - til að hafa g1-hrókinn valdaðan. Svartur verður þá að þvinga fram jafntefli með 45. ... g4+! 46. Kxg4 H6h4+ o.s.frv.

Þetta er gott dæmi um yfirburði tölvuforrita í flóknum stöðum og skýrir vel þá miklu tortryggni sem ríkir stundum á skákmótum nú til dags.

Helgi Ólafsson [e-mail]

-------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 4. mars 2012

Skákþættir Morgunblaðsins

[Event "Tradewise Gibraltar"] [Site "Caleta ENG"] [Date "2012.01.31"] [EventDate "2012.01.24"] [Round "8"] [Result "1-0"] [White "Yifan Hou"] [Black "Le Quang Liem"] [ECO "B93"] [WhiteElo "?"] [BlackElo "?"] [PlyCount "79"] 1. e4 c5 2. Nf3 d6 3. d4 cxd4 4. Nxd4 Nf6 5. Nc3 a6 6. f4 e6 7. Be2 Qc7 8. O-O Be7 9. Kh1 O-O 10. a4 Nc6 11. Be3 Re8 12. Bf3 Na5 13. Bf2 Nd7 14. Qe1 b6 15. e5 Bb7 16. Bg3 dxe5 17. fxe5 Rac8 18. Rd1 Bb4 19. Qf2 Rf8 20. Ne4 Nxe5 21. Bf4 Bxe4 22. Bxe4 Bd6 23. Nf3 f5 24. Bxe5 Bxe5 25. Bd3 Bxb2 26. Rb1 Bc3 27. Ng5 Qe7 28. Qe3 Nc4 29. Bxc4 Rxc4 30. Rxb6 Bd4 31. Qd3 Rxa4 32. Rxe6 Qa3 33. Qe2 h6 34. Rxh6 gxh6 35. Qe6+ Kg7 36. Qd7+ Kg6 37. Ne6 Bc5 38. Qg7+ Kh5 39. Nxf8 Bxf8 40. Qf7+ 1-0