Gunnar sigraði í Gallerý Skák í gær

Kappteflið um FriðriksKónginn hélt áfram í Gallerý Skák í gærkvöldi þar sem 20 kappleiksmenn tóku þátt.  Þrír efstu menn skáru sig úr en annars var mótið  nokkuð jafnt og enginn skák unnin fyrirfram.   Loftið í keppnissalnum  var spennuþrúngið  og lævi blandið eins og sjá má á meðf. myndum og úrslita úr einstökum skákum beðið með óþreyju.

Hlutskarpastur að þessu sinni varð Gunnar Skarphéðinsson sem sigraði með fullu húsi, halaði inn 11 vinninga af 11 mögulegum.  Frábært hjá honum sem þurft að kljást við marga slúngna og harðskeytta andstæðinga, þar á meðal vestfirðingana Magnús Sigurjónsson og Guðfinn R. Kjartansson, sem ekki kalla allt ömmu sína í þessum efnum.  Þeir urðu jafnir í 2.-3.  sæti með 9 vinninga slétta sem verður að teljast bærileg uppskera.

Staðan í keppninni er nú sú að þeir Gunnar og Guðfinnur eru efstir og jafnir eftir tvo mót af fjórum með 16 GP-stig, en Magnús og Bjarni Hjartarson koma næstir með 8 stig.  Besti árangur 3 mótum telur til úrslita.

Næsta mót fer fram að viku liðinni, fimmtudaginn 9. febrúar og hefst kl. 18.  Nánar á www.galleryskak.net.

Myndaalbúm (ESE)