Fjöltefli Friðriks í Hörpu í dag: ,,Hann blómstraði á gullöld skáklistarinnar"

Stór og skemmtileg stund í íslenskri skáksögu er runnin upp: Friðrik Ólafsson teflir í dag við 13 efnileg börn og ungmenni í Hörpu.

Fjölteflið hefst klukkan 13 og eru skákáhugamenn hvattir til að mæta og fylgjast með goðsögninni mæta meisturum framtíðarinnar.

Helgi Ólafsson stórmeistari og Skólastjóri Skákskólans, sem stendur að viðburðinum ásamt Skákakademíu Reykjavíkur segir í viðtali við Fréttablaðið í morgun: „Það voru margir góðir skákmenn hér á Íslandi á tuttugustu öldinni en Friðrik er skákmaður aldarinnar, á því er enginn vafi.“

Helgi segir að Friðrik hafi blómstrað gullöld skáklistarinnar:

 „Hann er auðvitað stórmerkilegur skákmaður eins og ferill hans sýnir. Hann varð fyrst Íslandsmeistari fyrir tæpum sextíu árum og varð Norðurlandameistari árið eftir. Hann náði hápunkti ferilsins á árunum 1958 til 59 þegar hann komst á áskorendamótið um heimsmeistaratitilinn. Þar mætti hann mönnum eins og Bobby Fischer, sem var þá unglingur, Tal, Petrosian og fleirum. Þessir þrír urðu allir síðar heimsmeistarar, þannig að þetta má kalla eins konar gullöld skáklistarinnar.“

Fjölteflið hefst stundvíslega klukkan 13 og mun standa í um tvær klukkustundir.

Allir eru velkomnir að fylgjast með krökkunum takast á við stórmeistarann. Þeir sem komast ekki í Hörpu geta fylgst með beinum útsendingum á skak.is.

Krakkarnir sem mæta Friðrik í dag eru:

Dawid Kolka, 11 ára, Álfhólsskóla. Íslandsmeistari barna.

Dagur Ragnarsson, 14 ára, Rimaskóla. Stigahæsti skákmaður landsins á grunnskólaaldri og margfaldur  Íslandsmeistari með sveit Rimaskóla.

Donika Kolica, 14 ára,  Hólabrekkuskóla. Hefur orðið stúlknameistari Taflfélags Reykjavíkur og oftsinnis náð mjög góðum árangri.

Felix Steinþórsson, 10 ára, Álfhólsskóla. Byrjaði fyrir alvöru í skákinni fyrir aðeins ári og þykir mjög efnilegur.

Gauti Páll Jónsson, 12 ára, Grandaskóla. Fyrirliði skáksveitar Grandaskóla, margreyndur meistari þrátt fyrir ungan aldur.

Heimir Páll Ragnarsson, 10 ára, Hólabrekkuskóla. Teflir á 1. borði fyrir skólann og hefur keppt á Norðurlandamóti.

Hilmir Freyr Heimisson,10 ára, Salaskóla. Unglingameistari Taflfélags Reykjavíkur.

Hrund Hauksdóttir, 15 ára, Rimaskóla. Telpnameistari Íslands og margfaldur Íslandsmeistari með sveit Rimaskóla.

Nansý Davíðsdóttir, 9 ára, Rimaskóla. Íslandsmeistari stúlkna og Norðurlandameistari 2011 með sveit Rimaskóla.

Oliver Aron Jóhannesson, 13 ára, Rimaskóla. Margfaldur Íslandsmeistari með sveit Rimaskóla og Íslandsmeistari 13 ára og yngri í einstaklingsflokki.

Sóley Lind Pálsdóttir, 12 ára, Hvaleyrarskóla. Hefur meðal annars orðið Íslandsmeistari telpna.

Veronika Steinunn Magnúsdóttir, 13 ára, Hagaskóla. Teflir á efsta borði fyrir Hagaskóla og er skákþjálfari í Melaskóla.

Vignir Vatnar Stefánsson, 8 ára, Hörðuvallaskóla. Hefur keppt á Evrópumóti, yngsti fulltrúi Íslands í skák á erlendis frá upphafi.