Tíu fræknir krakkar gegn meistara Friðrik í Hörpu á morgun!

 

Tíu krakkar á grunnskólaaldri tefla á morgun, laugardaginn 3. desember, við Friðrik Ólafsson fyrsta stórmeistara Íslendinga.

Fjölteflið fer fram í Hörpu og hefst kl. 13. Allir velkomnir að koma og fylgjast með glímu besta skákmanns Íslandssögunnar við meistara framtíðarinnar.

Friðrik verður 77 ára í janúar og er nýkominn af alþjóðlegu skákmóti í Hollandi.

Senn eru liðin 60 ár síðan hann varð Íslandsmeistari í fyrsta sinn, árið 1952. Ári seinna varð Friðrik Norðurlandameistari og á næstu árum komst hann í hóp bestu skákmanna heims.

Skákskóli Íslands og Skákakademía Reykjavíkur standa að fjölteflinu í Hörpu á laugardaginn, og munu jafnframt munu kynna starf sitt, sem er fjölbreytt og kraftmikið.

Fjölteflið hefst stundvíslega klukkan 13 og er áætlað að það standi í rúmlega tvær klukkustundir. Össur Skarphéðinsson utanríkisráðherra mun flytja setningarávarp.

Skákirnar verða sendar út beint á netinu og hægt að fylgjast með gangi mála á skak.is.

Krakkarnir sem tefla við Friðrik eru:

Dagur Ragnarsson, 14 ára, Rimaskóla. Stigahæsti skákmaður landsins á grunnskólaaldri og margfaldur  Íslandsmeistari með sveit Rimaskóla.

Donika Kolica, 14 ára,  Hólabrekkuskóla. Hefur orðið stúlknameistari Taflfélags Reykjavíkur og oftsinnis náð mjög góðum árangri.

Gauti Páll Jónsson, 12 ára, Grandaskóla. Fyrirliði skáksveitar Grandaskóla, margreyndur meistari þrátt fyrir ungan aldur.

Hilmir Freyr Heimisson,10 ára, Salaskóla. Unglingameistari Taflfélags Reykjavíkur.

Hrund Hauksdóttir, 15 ára, Rimaskóla. Telpnameistari Íslands og margfaldur Íslandsmeistari með sveit Rimaskóla.

Nansý Davíðsdóttir, 9 ára, Rimaskóla. Íslandsmeistari stúlkna og Norðurlandameistari 2011 með sveit Rimaskóla.

Oliver Aron Jóhannesson, 13 ára, Rimaskóla. Margfaldur Íslandsmeistari með sveit Rimaskóla og Íslandsmeistari 13 ára og yngri í einstaklingsflokki.

Sóley Lind Pálsdóttir, 12 ára, Hvaleyrarskóla. Hefur meðal annars orðið Íslandsmeistari telpna.

Veronika Steinunn Magnúsdóttir, 13 ára, Hagaskóla. Teflir á efsta borði fyrir Hagaskóla og er skákþjálfari í Melaskóla.

Vignir Vatnar Stefánsson, 8 ára, Hörðuvallaskóla. Hefur keppt á Evrópumóti, yngsti fulltrúi Íslands í skák á erlendis frá upphafi.