Skemmtilegt deildamót að Kleppsspítala

Hið árlega deildamót Skákfélags Vinjar og Hróksins var haldið í samkomusal Kleppsspítala í dag, miðvikudag klukkan 13.

Um árabil kepptu geðdeildir sín á milli en eftir að þessi mót höfðu legið í dvala endurvöktu þessi félög keppnina fyrir nokkrum árum. Þrír eru í liði og liðin hafa að undanförnu verið 6-7 en aðeins fjögur mættu til leiks í dag. Ófært var yfir heiðina þar sem tvö voru í startholunum fyrir austan og nokkrir forfölluðust á síðustu stundu. Reglan er að einn starfsmaður má vera í liðinu.

Deild 12 hefur innan sinna raða öfluga skákmenn sem starfað hafa þar um árabil og svo vill til að margir sem þurft hafa að leita sér aðstoðar þar á bæ eru áhugasamir um skákina og sumir  útlærðir keppnismenn. Fór svo á endanum að deildin sigraði 33c í úrslitaviðureign og búsetukjarninn að Flókagötu 29-31 og deild 15 komu þar rétt á eftir.

Tefldar voru sjö mínútna skákir og skákstjóri var Róbert Lagerman.

Sögur-útgáfa gaf glæsilega vinninga en auk þess fékk sigurliðið að venju bikar sem fer beint upp á hillu. Sérstök borðaverðlaun voru veitt, „Lygarinn" hans Óttars Norðfjörð fékk þrjá nýja eigendur sem voru heldur betur sáttir.

Í sigurliði deildar 12 voru þau: Gunnar Freyr, Guðmundur Valdimar og Guðrún Stella.