EM-pistill nr. 7

EM-pistill nr. 7: Tap gegn Georgíu - Makedóníumenn dag

Tap gegn Georgíu var staðreynd í gær - framför þó frá tapinu 0,5-3,5! Helgi Ólafsson var mikinn og vann nú sterkan stórmeistara örugglega í frábærri skák. Hjörvar Steinn Grétarsson beitti nýjung , sem í fólst peðsfórn, sem hann og Björn hefðu skoðað en Jobava hafði hlutina á hreinu. Bragi átti víst góðan leik í byrjun skákar sem hann fann ekki og fékk verra tafl og tapaði. Björn átti kost á jafnteflislegri leið en valdi aðra og tapaði. Lukkan ekki með okkur í gær. Í dag teflum við Makedóníu menn sem eru raðaðir heldur fyrir ofan okkur. Menn eru fullir bjartsýnni. Helgi hvílir eftir 3 sigurskákir í röð og ætlar að einbeita sér að liðsstjórn í dag.

Ekkert reyndi á mig í skákstjórn í gær en atvik kom upp í viðureign Asera og Frakka. Mér skilst að Gashimov hafi veikst og menn hafi í framhaldinu sæst á 2-2 jafntefli. Eitthvað sem Frakkarnir hafa örugglega verið ánægðir með fyrirfram.

Skákstjórar vinna yfirleitt 2 og 2 saman. Í gær lenti ég með samviskusamasta skákstjóra sem ég hef nokkurn tíma unnið með. Hann tók sér varla hlé til að fara á salernið né að fá sér kaffi. Hann sá um íslensku viðureignina og þegar ég fannst hafa of mikinn áhuga á henni bað hann mig um að vera fyrir aftan liðið! Þetta varð til þess að ég átti verr með að komast fram til að senda SMS! Ég vil frekar vinna með afslappaðri skákstjórum sem átta sig á því að þeir eru ekki aðalatriðið heldur keppendurnir! Sætasti skákstjóri á staðnum er svo hins vegar gríska þokkadísin María.

Búlgarar héldu áfram sigurgöngu sinni og unnu nú Þjóðverja örugglega. Ég sem var farinn halda að örvandi efni væru komin í græna teið hans Uwe Bönch!

Búlgarar hafa 9 stig. Rúmenar, Aserar Frakkar og Grikkir hafa 8 stig. Rúmenar og Grikkir hafa komið verulega á óvart og þær tvær sveitirnar mætast svo í dag á öðru borði Búlgarar keppa við Frakka og Aserar við Rússa sem lögðu Úkraínumenn sem eru nú aðeins 17.

Þrátt fyrir tapið í gær erum við enn í 2. sæti í NM -keppninni með 2 stig. Danir sem steinlágu fyrir Armenum leiða með 5 stig, Svíar, Finnar og Norðmenn hafa 3 stig.

Þar sem ég lenti á mikilvægum fundi í morgun verður þessi pistill í styttra lagi. Meira á morgun.

Spennandi viðureign framundan. Ég mun sem fyrr stefna að því að koma úrslitum nánast jafnóðum til Halldórs Grétars og Sigurbjörns í gegnum SMS og þaðan á hornið, ef ég lenti á afslappaðri félaga í skákstjórn!

Kveðja frá Porto Carras,
Gunnar