EM-pistill nr. 6: Góður sigur í gær gegn Svartfellingum – Georgíumenn í dag

Það vannst góður sigur á Svartfellingum í 4. umferð EM sem fram fór í gær. Bragi Þorfinnsson og Helgi Ólafsson unnu, Hjörvar Steinn Grétarsson gerði jafntefli en Henrik Danielsen tapaði. Í dag eru það svo Georgíumenn en þar eigum við harma að hefna eftir stórtap 2007.

En byrjum á viðureigninni í gær. Hjörvar Steinn Grétarsson var fyrstur að klára. Gerði jafntefli í aðeins 12 leikjum með svörtu á öðru borði. Fín úrslit. Henrik fórnaði skiptamun fyrir og fékk góða stöðu en lék ónákvæmt í framhaldinu og fékk tapað tafl. Einn ónákvæmur leikur réð úrslitum. Bragi vann góðan sigur á 3. borði, með 4. Dc2 gegn Nimzo-indverski vörn. Leikur sem hefur reynst vel hér úti. Helgi Ólafsson tefldi á borði, við keppenda sem mér fannst helst líkjast leikaranum Robbie Coltrane. Helgi fékk vænlegt tafl með svörtu og vann mikilvægan sigur og tryggði þannig sigur liðins. Það er ekki amalegt að hafa menn eins og Helga á „bekknum" og það er ljóst að það gefur liðinu aukiðsjálfstraust.

Álagið á mig jókst um 50% í gær. Ég sá um 3 viðureignir en ekki 2. Það er fínt enda finnst manni ekki mikið að sjá um 12 skákir. Á ólympíuskákmótum er hver skákstjóri aðeins með eina viðureign. Ég var svo heppinn að vera hliðina á íslenska liðinu og átti auðvelt með að hlaupa yfir.

Umferðin hófst með því í gær að klappað var fyrir litháísku skákkonunni Dana Reizniece-Ozola. Sú varð þrítug í gær. Hún virðist vera ofurkona. Er þingmaður og átti nýlega sitt þriðja barn en teflir hér allar skákir en Lettar eru varamannslausir.

Ég var einmitt skákstjóri hjá Lettum í gær, reyndar í opnum flokki. Alexei Shirov var áhugasamastur áhorfenda um þá viðureign og fylgdist náið með fyrrum löndum sínum. Þeir töpuðu fyrir Dönum 2,5-1,5.

Í gær svo gerðist að hljóðkerfið fór í gang með miklum skruðningi í miðri umferð. Mönnum snarbrá enda mjög óþægilegur hávaði á skákmóti.

Eins og fram hefur komið fór ég með rangt mál þegar ég hélt því fram að Hjörvar væri sá yngsti sem teflt fyrir Íslands hönd á fyrsta borði. Friðrik Ólafsson var sá yngsti í Helsinki 1952, þegar Gilfer hvíldi. Ég fékk nokkra pósta þess efnis og ánægjulegt að sjá hvað skákáhugamenn eru með tölfræðina á hreinu. Helgi Ólafsson benti mér svo einnig á þetta og bætti svo við. „Hvað ætlar þú svo að bulla í dag, Gunnar". Svo var hlegið! Mér er ljúft að leiðrétta þetta.

Toppbaráttan tók á sig óvænta mynd í gær. Búlgarar völtuðu yfir Rússa, 3-1, og skilst mér að sá sigur hafa verið mjög sannfærandi. Topalov í feiknaformi. Nepo sá eini af Rússunum sem er að standa sig. Þjóðverjar tók svo Úkraínumenn enn stærra, 3,5-0,5. Tvær stigahæstu sveitirnar, Rússar og Úkraínumenn eru nú í 12. og 13. sæti með aðeins 5 stig. Til að kóróna hlutina fyrir þessar sveitir mætast þær í dag. Sveitin sem tapar þeirri viðureign verður aðeins með 50% stiga.

Ekki ætlar af Englendingum að ganga. Sveitin fékk Armeníu í 3. umferð þegar báðar sveitirnar höfðu 2 stig. Englendingar fengu svo Ísraelsmenn í gær og töpuðu með minnsta mun. Englendingar eru aðeins í 27. sæti og mæta Lettum.

Þjóðverjar, Aserar, Frakkar, Spánverjar og Búlgarar eru öll með 7 stig. Þjóðverjar efstir að vinningum með 11 vinninga en hinar þjóðirnar hafa 10,5 og 10 vinninga. Aserar og Frakkar mætast, Þjóðverjar og Búlgarar og svo Spánverjar og heimamenn sem hafa farið á kostum hér.

Ég ætla hér með að spá Aserum sigri. Helgi hefur hins vegar mesta trú á Búlgörum. Það er hins vegar flest sem bendir til þess að lokabaráttan geti orðið hrikalega spennandi.

Danir leiðir í Norðurlandakeppninni. Þeir hafa 5 stig. Við erum aðrir með 4 stig, Svíar og Norðmenn hafa 3 stig og Finnar aðeins 1 stig, sem þeir náðu í fyrstu umferð með jafntefli gegn Hollendingum. Norðmenn unnu sínar fyrstu skákir þegar þeir lögðu Skota með minnsta mun. Skotar virðast hafa lent í Norðurlandamóti en þeir eru að mæta þriðju Norðurlandaþjóðinni í dag. Danir fá svo heimsmeistara Armena í dag.

38 þjóðir af 54 taka þátt. Það er merkilegt að velta því fyrir sér hvaða þjóðir vantar. Flestar minni þjóðir vantar, sem margar láta Ólympíuskákmótið duga, en meðal þjóða sem vantar eru Hvíta-Rússland, Slóvakía og Bosnía.

Í dag mætum við svo Georgíumönnum. Þeir stilla upp aðalliðinu. Varamaðurinn hefur lítið fengið að spreyta sig og sjálfsagt hafa þeir ekki talið rétt að stilla honum svo upp gegn Helga á fjórða borði.

Á EM 2007 mættum við einmitt Georgíumönnum í fyrstu umferð. Þeir véluðu okkur niður 3,5-0,5. Henrik Danielsen var sá eini sem náði þá punkt og sá eini sem er í liðinu nú. Og hann hvílir. Því erum fjóra aðra einstaklinga sem vonandi nær mun betri úrslitum en 2007.

Nóg í bili. Spennandi viðureign framundan. Ég mun sem fyrr stefna að því að koma úrslitum nánast jafnóðum til Halldórs Grétars og Sigurbjörns í gegnum SMS og þaðan á hornið.

Kveðja frá Porto Carras,
Gunnar

Athugasemdir

[Gunnar Th. Gunnarsson, 7.11.2011 kl. 15:26]

Takk fyrir góða pistla

[Gunnar Björnsson (IP-tala skráð) 7.11.2011 kl. 18:32]

Takk fyrir þetta nafni!

[Friðrik (IP-tala skráð) 7.11.2011 kl. 19:31]

"Umferðin hófst með því í gær að klappað var fyrir litháísku skákkonunni Dana Reizniece-Ozola. Sú varð þrítug í gær. Hún virðist vera ofurkona. Er þingmaður og átti nýlega sitt þriðja barn en teflir hér allar skákir en Lettar eru varamannslausir."

Eistland, Lettland, Litháen. Eitthvað finnst mér vera að þessari málsgrein.

[Gunnar Björnsson (IP-tala skráð) 7.11.2011 kl. 19:48]

Rétt, hún er lettnesk.  Helgi Ól hafði rétt fyrir sér.  Ég held áfram í bullinu!