EM-pistill nr. 5: Spennandi viðureign í dag

Það er loks í fjórðu umferð að við fáum sveit sem er áþekk okkur að styrkleika.   Í dag mætum við Svartfellingum sem eru þó rankaðir heldur fyrir ofan okkur.  Viðureignir gegn slíkum sveitum eru hvað mikilvægastar.  Ef við vinnum fáum við gott lið í næstu umferð en ef við töpum getum við fengið mjög slaka sveit.   Björn Þorfinnsson hvílir eftir tap í gær gegn Lúxemborg og Helgi Ólafsson liðsstjóri heldur áfram að tefla eftir góðan sigur í gær.

Fyrst um viðureignina í gær.  Björn var fyrstur að klára.  Hann lék illa af sér og nánast þvingaði andstæðinginn til að vinna skákina þar sem andstæðingurinn átti aðeins einn leik sem leiddi beint til vinnings.  Hjörvar Steinn Grétarsson vann góðan sigur á alþjóðlega meistaranum Fred Berend á fyrsta borði.  Söguleg skák enda Hjörvar sá yngsti sem nokkurn hefur teflt fyrir Íslands hönd á fyrsta borði.  Jafnframt sá fyrsti sem ekki er stórmeistari né alþjóðlegur meistari í einhverja áratugi

Merkilegt ekki síst í ljósi að þegar landsliðið var upphaflega valið var Hjörvar á fjórða borði!
Og talandi um Hjörvar.  Skákin gegn Shirov hefur vakið athygli langt fyrir utan landssteinana og hafa ýmsir haft samband við Hjörvar og óskað honum til hamingju með sigurinn.  Skákin var skýrð á Chessmind og má nálgast þær hér:  http://www.thechessmind.net/storage/chess-posts/gretarsson_shirov_eutch2011.htm

Skemmtilegar skýringar eftir Dennis Monokroussos, og ekki síst kommentið eftir 15. leik Hjörvars sem er mikið búið að hlæja af hér: Remind me, which one of these two is Shirov? White sacs a piece for two pawns, to complete his development and to maintain the initiative. It's exciting, plausible, and...bad.

Og aftur að viðureigninni gegn Lúxurum.  Helgi liðsstjóra vann flottan sigur á Fionu á fjórða borði. Gaman að sjá Helga aftur í landsliðinu en þetta er í fyrsta skipti síðan 2006 að Helgi teflir fyrir Íslands hönd.

Bragi átti lengstu skák dagsins en vann endatafl með mislitum biskupum.   Skyldusigur gegn Lúxemborg staðreynd.

Við erum með 2 stig og 5,5 vinning og erum í 28. sæti. Danir unnu stórsigur á Norðmönnum 3,5-0,5 og eru efstir Norðurlanda.  Við erum þriðju.  Svíar unnu Finna 2,5-1,5.  Danir og Svíar hafa 3 stig en Finnar og Norðmenn hafa 1 stig.    Ég spái því hér og nú að við mætum 2 Norðurlandaþjóðum á mótum. 

Aserar og Spánverjar eru efstir með 6 stig.  Shirov hefur unnið báðar skákirnar síðan hann tapaði fyrir Hjörvari.  Fimm þjóðir hafa 5 stig.   Armenar rétt náðu að hanga á jafntefli gegn Englendingum.

Ég var farinn að sjá það fyrir mér að við myndum mæta Armenum í dag!

ECU-fundinum í gær lauk fremur friðsamlega.  Sumu var frestað til aðalfundarins 2012 sem fram fer í Istanbul samhliða Ólympíuskákmótinu.  Ég mætti á skákstað að loknum fundi og fór í skákstjórn.  Enn á ný sá ég um Svisslendinga en Korchnoi tapaði nú og var ekki kátur.  Kallinn stundi hátt að skák lokinni. 

Korchnoi er ekki sá eini sem er notar staf hér.  Það gerir einnig Viktor Bologan sem er draghaltur eftir fótbrot.  Hann meiddist í fótbolta þannig að „aldraðir" skákmenn mættu hugsa sinn gang í þriðjudagsboltanum!

Á hótelinu er eitt stærsta spilavíti Grikklands.  Mér skilst að sumir Grikkja, væntanlega vel efnaðir, bóki sig hingað á föstudögum og spili svo alla helgina.  Sumir skákmenn munu vera víst vera fastagestir þarna og er merkilegt að einn sterkasti skákmaður heims spilar þarna á hverju kvöldi og langt fram á nótt en stendur sig engu að síður mjög vel.  Menn undirbúa sig á mismunandi hátt fyrir skákir!

Verðlag hérna er dýrt.  Ég fékk mér kaffi eftir eina máltíðina og það kostaði  4,50 evru eða um 700 kr!  Síðan þá hef ég látið vatnið duga með matnum. 

Ég er afskaplega hrifinn af skipulagningunni hjá Grikkjunum.  Salurinn er settur upp á mjög smekklegan hátt og yfirleitt geta áhorfendur komist býsna nærri skákmönnum án þess þó að trufla.   Skákmenning á Grikklandi er einfaldlega mjög góð.   EM taflfélaga verður á Rhodos 2013 sem hljómar vel fyrir skákmenn.  Arthur Kogan, ísraelskur stórmeistari og liðsstjóri Ítala, lofar svo mjög góðum aðstæðum á næsta EM taflfélaga sem verður í Ísrael. 

Grikkirnir sögðu mér það að það hafi stefnt í rigningu í gær.  Því fylgja smá vandamál þar sem um 10 mínútna gangur er á skákstað.   Grikkirnir segjast eiga nóg af regnhlífum!  Einnig er hægt að taka svo hálfgerða barnalest á skákstað og nota Armenarnir hana. 

Hér er mjög fallegt eins og sjá má á heimasíðu svæðisins:  http://www.portocarras.com/default.asp?pid=1&la=4

Nóg í bili.  Spennandi viðureign framundan.  Ég mun reyna að koma úrslitum jafnóðum til Halldórs Grétars í gegnum SMS.  Mér skilst þó að Grikkirnir standi sig afskaplega vel í því að skrá inn úrslit fljótt og vel á Chess-Results.  

Kveðja frá Porto Carras,
Gunnar