Liberec Open - Pistill annarar umferðar

Ekki var ég ánægður með daginn í dag!  Ekki það að úrslit umferðarinnar væru svo slæm heldur vildi ég mun fleiri vinninga í hús, sérstaklega ef miðað er við stöður stelpnanna í dag.  Ég ætla því að koma pistlinum frá mér strax svo að ég sé laus við hann.

Hallgerður Helga Þorsteinsdóttir (2023) - Virginijus Dambrauskas (2316) 0-1
Hallgerður tefldi við alþjóðlegan meistara sem er u.þ.b. 300 stigum hærri en hún.  Hallgerður tefldi vel og algjörlega samkvæmt því plani sem við höfðum lagt upp fyrir daginn.  Hún uppskar líka þægilega stöðu en í framhaldinu teygði hún sig of langt í vinningstilraununum og sat allt í einu uppi með tapað tafl.  Frekar ergilegt því jafntefli hefðu svo sem verið ágætis úrslit.  Hallgerður kemur örugglega til baka á morgun.

Zedenek Cakl (2078) - Jóhanna Björg Jóhannsdóttir (1803) 0-1
Skák dagsins í dag var klárlega skák Jóhönnu gegn hinum tékkneska Cakl sem er einungis 275 stigum hærri en hún.  Það er skemst frá því að segja að Jóhanna tefldi afar vandaða skák og lék í raun aldrei af sér og kláraði síðan andstæðinginn um leið og hann varð naumur á tíma afar vel gert! Skákin fylgir með hér að neðan.

Petr Paldus (2026) - Elsa María Kristínardóttir (1708) 1-0
Elsa María tefldi við andstæðing sem er ekki nema 320 stigum hærri en hún! Hún var lengi vel með fína stöðu en missti af 2-3 vænlegum leiðum sem hefðu gefið henni fínt tafl og því fór sem fór.  Örlítil meiri þolinmæði og smá slatti af sjálfstrausti (þessir 2000 stiga menn eru einfaldlega ekkert betri en hún) hefðu fleytt henni langt í þessari skák.

Sigríður Björg Helgadóttir (1716) - ZdZislaw Lesinski (1932) 0-1
Andstæðingur Sigríðar í dag er "einungis" rétt rúmlega 200 stigum hærri en hún.  Byrjunin heppnaðist vel og hún fékk þægilega stöðu.  Eftir ónákvæmni í miðtaflinu fékk hún svo verri stöðu en snéri laglega á andstæðinginn og var skyndilega komin í bílstjórasætið.  Andstæðingurinn tefldi þó vel og hótaði þráskák.  Sigríður hafði loks val um að vekja upp aðra drottningu og vera með tvær drottningar gegn hróki og tveimur léttum sem leiddi strax til jafnteflis þar sem andstæðingurinn átti þráskák, eða að hindra þráskákina með því að fórna drottningunni fyrir annan létta manninn og vekja svo upp drottningu.  Gallin við seinni leiðina var að þrátt fyrir að vera liði undir hafði andstæðingurinn rennandi frípeð sem ekkert varð ráðið við.  Undirritaður sá hvað verða vildi og hugsaði stöðugt "ekki reyna að vinna, plííís ekki reyna að vinna" en loftið í skáksalnum var líklega of þungt til að þetta kæmist til skila.  Það verður því að teljast vonbrigði dagsins að ekkert fékkst úr þessari skák.  Sigga er harðákveðin í það koma til baka á morgun!

Tinna Kristín Finnbogadóttir (1803) - Jan Hanus (1493) 1-0
Tinna var sú eina í dag sem tefldi við stigalægri andstæðing.  Hún tefldi nokkuð öruggt og uppskar fínan vinning á fremur þægilegan hátt.  Ég var mjög ánægður með Tinnu í dag, sérstaklega þar sem hún ákvað að tefla fremur rólega til að stressa ekki þjálfarann of mikið! Hún á það nefnilega til að ráðast á menn með miklum látum og ófyrirsjáanlegum afleiðingum sem er algjörlega óþarfi þegar teflt er við mikið lakari andstæðing.

Hrund Hauksdóttir (1592) - Kacper Grela (1799) 0-1
Hrund, eins og allar stelpurnar í dag fékk fína stöðu úr byrjuninni og algjörlega í takt við það sem við fórum yfir í morgun.  Hún varð hins vegar fyrir því óláni að gleyma að leika hvítreita biskupnum sínum út á réttum tíma sem varð til þess að staða hennar féll saman.  Leiðinlegt því að hún á að hafa í fullu tré við andstæðinga sem ekki eru "nema" 200 stigum hærri en hún.  Þetta kemur bara hjá henni á morgun!

Cakl,Zdenek - Johannsdottir,Johanna Bjorg [A30]

1.Rf3 Rf6 2.b3 g6 3.Bb2 Bg7 4.c4 c5 5.g3 Rc6 6.Bg2 0–0 7.0–0 d6 8.e3 Bf5 9.d4 cxd4 10.Rxd4 Bg4 11.Dd2 Hc8 12.Rc3 Da5 13.f3 Bd7 14.Hfd1 Hfe8 15.Rxc6 bxc6 16.e4 Hb8 17.Kh1 Be6 18.De2 Dh5 19.He1 Rd7 20.Rd1 Re5 21.Hb1 a5 22.Re3 a4 23.Ba1 axb3 24.axb3 Hb6 25.b4 Ha8 26.Bd4 Hba6 27.g4 Dg5 28.b5 Ha2 29.Hb2 Ha1 30.b6 Hxe1+ 31.Dxe1 Rxf3 0–1

Á morgun tefla stelpurnar við:
Jóhanna - Christian A. Erikssen (2126)
Jaroslav Novotny (2023) - Tinna
Karl Horak (1828) - Hallgerður
Elsa - Stansilav Splichal (2195)
Alexander Bulano (1817) - Hrund
Jan Hanus (1493) - Sigga 

Slóðin á mótið er:  http://www.czechtour.net/liberec-open/
Slóðin á úrslit er: http://chess-results.com/tnr58314.aspx?art=2&rd=2&lan=1&turdet=YES&flag=30

Davíð Ólafsson