Ráðherra bauð Norðurlandameisturum Rimaskóla til móttöku í Ráðherrabústaðnum

Starfandi mennta-og mennigarmálaráðherra, Svandís Svavarsdóttir, bauð skáksveit Rimaskóla, Norðurlandameisturum barnaskólasveita 2011, til glæsilegrar móttökuathafnar í ráðherrabústaðnum við Tjarnargötu. Svandís ávarpaði krakkana í upphafi móttökunnar og óskaði þeim hjartanlega til hamingju með frábæran árangur. Hún sagðist sem mennta-og menningarmálaráðherra vera stolt af þessum góða árangri fyrir Íslands hönd.

Ráðherra hvatti þau áfram til dáða við skákiðkun,  sagðist einungis líta á skákina jákvæðum augum. Loks óskaði hún Rimaskóla til hamingju með glæsilegan árangur á skáksviðinu á undanförnum árum. Helgi Árnason skólastjóri þakkaði í stuttri ræðu ráðherra fyrir boðið og þau hvatningarorð sem hún talaði  til afrekskrakkanna ungu.  

Helgi afhenti mennta-og menningarmálaráðherra, skóla-og frístundasviði Reykjavíkur, Skákskóla Íslands og Skákakademíu Reykjavíkur innrammaðar myndir af skákkrökkunum í Rimaskóla sem teknar voru við merkileg tækifæri, við afhendingu verðlauna á NM barnaskólasveita í september og frá því þegar skáksveitir Rimaskóla hittu Anatoly Karpov fyrrverandi heimsmeistara fyrir nokkrum dögum.

Mennta-og menningarmálráðherra gaf sér góðan tíma til að ræða við krakkana, foreldra þeirra og forsvarsmenn skákhreyfingarinnar sem fjölmenntu í boðið. 

Myndaalbúm (HÁ og HJ)