Morgunblaðið: Vill ná enn lengra og hærra

„Þetta hefur hangið yfir mér og því var það mikill léttir að ná þessu," segir Stefán Kristjánsson, sem tryggði sér stórmeistaratign í skák um nýliðna helgi. Á stigalista Alþjóðaskáksambandsins, FIDE, eru 1.335 skráðir stórmeistarar og bætist Stefán formlega í hópinn í byrjun næsta árs.

„Ég var kominn ansi nálægt þessu 2006, hefði þá getað klárað þetta í einni skák," segir Stefán og vísar í næstsíðustu skák sína á Ólympíuskákmótinu á Ítalíu fyrir um fimm árum. „Ef ég hefði unnið skákina hefði ég fengið síðasta áfangann og náð stigunum en ég tapaði henni."

Aukið spennustig

Stefán náði þessum langþráða áfanga með sigri á móti Kristjáni Guðmundssyni, fyrrverandi liðsstjóra landsliðsins, í fyrri hluta Íslandsmóts skákfélaga. Fyrir skákina sagði dómarinn honum að með sigri næði hann stórmeistaratitli. „Vitneskjan jók aðeins spennustigið," segir skákmaðurinn, sem verður 29 ára á árinu. Hann bætir við að hann hafi verið með hvítu mennina, fljótlega náð góðu tímaforskoti og eftir langa viðureign hafi mótherjinn gefist upp í endatafli. „Ég bara brosti," segir Stefán um viðbrögð sín, þegar stórmeistaratignin var í höfn. „Ég var ánægður, en þetta er ekki eins og þegar maður skorar í fótboltanum. Ég fór ekkert fagnandi um skáksalinn."

Fyrsta stórmeistaraáfanganum náði Stefán á alþjóðamóti í Noregi 2004, þeim næsta í Ungverjalandi og þeim þriðja í Austurríki 2006. Hins vegar vantaði nauðsynlegan stigafjölda þar til nú. Hann segir að á menntaskólaárunum hafi hann sett stefnuna á að verða stórmeistari, en undanfarin fimm ár hafi skákin vikið fyrir öðru áhugamáli, pókerspili á netinu sem hafi gefið vel í aðra hönd. Hins vegar gerir hann ráð fyrir að skákin verði aftur í fyrirrúmi hjá sér þegar hann verði kominn á ríkislaun sem stórmeistari, þó að sér skiljist að þau séu ekki há, en þau miðast við laun háskólalektora.

Stefán byrjaði að tefla í Melaskólanum, þegar hann var 11 ára, segir að sér hafi fljótlega gengið vel og áhuginn aukist samfara því. Það að vera stórmeistari kalli á ný markmið. Ná lengra og hærra með auknum sigrum á alþjóðamótum.

STEFÁN KRISTJÁNSSON SKÁKMAÐUR

Tólfti íslenski stórmeistarinn

Stefán Kristjánsson er 12. íslenski skákmaðurinn sem náð hefur þremur stórmeistaraáföngum og tilskildum 2.500 skákstigum. Hinir eru Friðrik Ólafsson (1958), Guðmundur Sigurjónsson (1975), Helgi Ólafsson (1985), Jóhann Hjartarson (1985), Jón L. Árnason (1986), Margeir Pétursson (1986), Hannes Hlífar Stefánsson (1993), Helgi Áss Grétarsson (1994), Þröstur Þórhallsson (1996), Henrik Danielsen (2006) og Héðinn Steingrímsson (2007). Lenka Ptácníková er íslenskur ríkisborgari og stórmeistari kvenna í skák (2004). Bobby Fischer, fyrrverandi heimsmeistari í skák og stórmeistari, var íslenskur ríkisborgari síðustu æviár sín og bjó þá hérlendis en tefldi aldrei sem Íslendingur.

------------------------------

Greinin er eftir Steinþór Guðbjartsson og birtist á baksíðu Morgunblaðsins, 12. október sl.  Skák.is þakkar Morgunblaðinu og Steinþóri fyrir að leyfa birtingu á Skák.is.  Mynd: Ómar Óskarsson