Skákþáttur Morgunblaðsins: Hinir mestu Mátar

A-sveit Taflfélags Bolungarvíkur heldur öruggri forystu í 1. deild eftir fyrri umferð Íslandsmóts taflfélaga sem fram fór í Rimaskóla um síðustu helgi. Þessa keppni, sem dregur til sín um 400 skákmenn hvaðanæva af landinu, má með réttu kalla stærstu skákhátíð Íslendinga á ári hverju. Keppnin sem fer fram í fjórum deildum einkennist af léttri og skemmtilegri stemningu í bland við mikið keppnisskap. Fjölmargir öflugir erlendir stórmeistarar hafa undanfarin ár sett svip sinn á Íslandsmótið og í A-sveit Bolvíkinga raða þeir sér fram fyrir þá Jóhann Hjartarson, Jón L. Árnason og nýbakaðan stórmeistara, Stefán Kristjánsson. Bragi Þorfinnsson, sem teflir á 8. borði, skrapp stundum í heimsókn til B-sveitarinnar og vann þar Héðin Steingrímsson í viðureigninni við Fjölni.

A- sveit Bolanna fékk góðan vind í seglin strax í 1. umferð þegar hún lagði félaga sína í B-sveitinni, 8:0. Sigur þeirra er nánast öruggur en staðan í 1. deild er þessi:

1. A-sveit TB 27 ½ v. 2. TR 19 v. 3. Hellir 18 v. 4. TV 16 ½ v. 5. B-sveit TB 15 ½ v. 6. SA 13 ½ v. 7. Mátar 11 v. 8. Fjölnir 7 v.

Snörp umræða um keppnisfyrirkomulagið hefur staðið yfir á spjallrás skákhreyfingarinnar en virðist ætla að skila óbreyttu ástandi:

„Hér tel ég rétt að aðhafast ekkert," skrifaði einn og virðist eiga marga skoðanabræður.

Eitt skemmtilegasta lið Íslandsmótsins mörg undanfarin ár hefur án efa verið sveit Skákfélags Akureyrar sem hefur á að skipa köppum á borð við Gylfa Þórhallsson, Áskel Örn Kárason, Ólaf Kristjánsson, Jón G. Viðarsson og Þór Valtýsson. Þeir eru alltaf harðir í horn að taka og hafa sett svip sinn a skáklíf Norðlendinga um áratuga skeið. Þeim laust saman við nýliðana Máta sem eru að uppistöðu til gamlir félagar úr Skákfélagi Akureyrar og unnu sigur eftir harða keppni.

Í 2. umferð mættu Akureyringar hinni öflugu sveit Bolvíkinga og þar tókst þeim Áskeli Erni og Halldóri Brynjari Halldórssyni að ná jafntefli gegn mun stigahærri andstæðingum:

Íslandsmót taflfélaga 2011/2012:

Vladimir Baklan - Áskell Örn Kárason

Sikileyjarvörn- Dreka afbrigðið

1. e4 c5 2. Rf3 d6 3. d4 cxd4 4. Rxd4 Rf6 5. Rc3 g6 6. g3 Rc6 7. Rde2 Hb8 8. a4 b6 9. Bg2 Bb7 10. O-O Bg7 11. Hb1 O-O 12. b3 a6 13. Bb2 Re5 14. He1 Red7 15. h3 He8 16. Rf4 Ba8 17. Rcd5 e6 18. Rxf6+ Rxf6 19. c4 b5?!

Áskell kann að hafa verið full fljótur á sér með þennan leik og Baklan tekst að halda frumkvæðinu með nákvæmri taflmennsku.

20. axb5 axb5 21. e5 dxe5 22. Bxe5 Hc8 23. Bxa8 Hxa8 24. cxb5 Db6 25. Dd3 Hed8 26. Dc3 Ha2?

Fyrstu mistökin. Hér var betra að leika 26. ...Hac8 með hugmyndinni 27. Db2 Re8 og svartur heldur vel í horfinu.

27. Hb2 Hxb2 28. Dxb2 Re8 29. Bxg7 Rxg7 30. De5 Rf5 31. Hc1 Rd4 32. Df6 Hb8?

Betra var 32. .... Dd6!

33. Rd5!

- Sjá stöðumynd -

Með þessum öfluga leik virtist Baklan loksins hafa náð að brjóta niður viðnám svarts. Ekki gengur nú 33. ... exd5 vegna 34. Hc8+! og vinnur. En Áskell er ekki af baki dottinn.

33. ... Re2+! 34. Kh2 Dd8

Geymir besta bitann þangað til síðar en 34. ... Dd4 kom einnig til greina.

35. Re7+ Kf8 36. He1?

Missir af besta leiknum, 36. Hc4! og hvítur ætti að vinna.

36. ... Dd4! 37. Df3 Kxe7 38. Dxe2 Hxb5

- Jafntefli.

----------------------------

Skákþættur Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 16. október 2011.

Skákþættir Morgunblaðsins