Vinafélagið stofnað fimmtudaginn 13. október undir kjörorðinu: Allir saman!

Vinafélagið blæs til stofnfundar á stórmóti í skák, í tilefni Alþjóðlegs geðheilbrigðisdags, fimmtudaginn 13. október klukkan 19 í Faxafeni 12. Að Vinafélaginu standa vinir og velunnarar Vinjar, athvarfs Rauða krossins við Hverfisgötu, en lokun vofir nú yfir þessum griðastað mörg hundruð einstaklinga.

Af þessum sökum hafa nokkrir einstaklingar tekið höndum saman um að stofna Vinafélagið, og eru allir hjartanlega velkomnir í félagið. Markmiðið er að standa vörð um og efla samfélagið í Vin. Markmið félagsins er að safna árlega þeirri upphæð, sem þarf til reksturs Vinjar, fyrir utan starfsmannahald.

Rauði krossinn hefur rekið Vin í 20 ár, en Reykjavíkurborg hefur lagt til húsnæðið. Í Vin eru fjórir starfsmenn og heildarkostnaður við rekstur rétt rúmlega 20 milljónir króna. Vinafélagið mun beita sér fyrir því að fleiri aðilar komi að rekstrinum, enda allir sammála um mikilvægi heimilisins í Vin.

Strax að loknum stofnfundi Vinafélagsins hefst stórmót sem Skákfélag Vinjar heldur, í samvinnu við TR, Helli, Skákakademíu Reykjavíkur og fleiri. Forlagið gefur glæsilega vinninga og má lofa skemmtilegu móti.

Tekið verður við skráningum í Vinafélagið á staðnum. Einnig tekur Björn Ívar Karlsson við skráningum í póstfanginu [e-mail]. Fólk er hvatt til að gerast stofnfélagar í Vinafélaginu og sýna þannig gestum Vinjar stuðning.

Ljóst er að málstaður Vinjar nýtur víða samúðar og stuðnings. Meðal þeirra sem gefa kost á kröftum sínum eru Magnús Matthíasson kennari og skákfrömuður, Styrmir Gunnarsson ritstjóri, Vigdís Grímsdóttir rithöfundur, Jón Kristjánsson fv. heilbrigðisráðherra, Þráinn Bertelsson rithöfundur og fleiri.

Vonandi munu sem flestir gerast stofnfélagar í Vinafélaginu, sem starfar undir kjörorðinu: Allir saman!