Birkir Karl vann skákmót Árnamessu annað árið í röð

Það var vel mannað og hart barist á Skákmóti Árnamessu sem haldið var í 3. sinn í Stykkishólmi laugardaginn 1. október. Um 70 grunnskólakrakkar, víðs vegar að af landinu, mættu til leiks og tefldu sex umferðir með 10 mínútna umhugsunartíma.

Birkir Karl Sigurðsson Skákfélagi Íslands stóð einn uppi sem sigurvegari. Hann vann allar sínar sex skákir á mótinu og Oliver Aron Jóhannesson Fjölni í hreinni úrslitaskák í síðustu umferð.  Oliver Aron hlaut önnur verðlaun og í þriðja sæti varð Hrund Hauksdóttir Fjölni, bæði með 5 vinninga af sex mögulegum.

Keppt var í þremur flokkum. Í yngri flokk f. 2000 og síðar sigraði Vignir Vatnar Sigurðsson TR einnig með 5 vinninga og stigahærri varð en Dawid Kolka Helli sem einnig hlaut 5 vinninga. Í 3. sæti í yngri flokki varð Jóhann Arnar Finnsson Fjölni með 4 vinninga.

Í flokki Snæfellinga sigraði Kristinn Hrafnsson úr Snæfellsbæ. Hann hlaut 4 vinninga. Auk Hrundar urðu í efstu sætum stúlkna þær Hildur Berglind Jóhannsdóttir  Helli og Nansý Davíðsdóttir Fjölni.

Alls voru veitt rúmlega 40 verðlaun sem fyrirtæki á Höfuðborgarsvæðinu og í Stykkishólmi gáfu á mótið. Það var Dagbjört Höskuldsdóttir formaður Safna-og menningarmálanefndar Stykkishólms sem lék fyrsta leikinn fyrir Oliver Aron, fyrirliða Norðurlandameistarasveitar Rimaskóla, og hafði hún áður minnst Árna Helgasonar, fyrrum heiðursborgara Stykkishólms, sem mótið er kennt við.

Í skákhléi var þátttakendum boðið upp á kók og Prince Póló og fyrir mótið höfðu þeir allir gætt sér á breiðfiskri fiskisúpu og pylsum með öllu. Mótið tókst mjög vel og gekk hratt og vel fyrir sig undir öruggri skákstjórn þeirra Páls Sigurðssonar og Helga Árnasonar. 

Mikil verðlaunahátíð var haldin í lok mótsins og var það Davíð Sveinsson fulltrúi bæjarstjórnar Stykkishólms sem afhenti sigurvegurum mótsins þau. Skákkrakkarnir ferðuðust til og frá Stykkishómi með 70 manna rútu Hópferðamiðstöðvarinnar og var Inga María Friðriksdóttir kennari fararstjóri og fórst það hlutverk vel úr hendi.

Skákdeild Fjölni hélt mótið og vill stjórn skákdeildarinnar færa öllum þeim sem komu að undirbúningi og aðstoð við mótið þakkir fyrir ómentanlegan stuðning og þátttakendum fyrir frábæra frammistöðu.

Lokastöðuna má finna hér í Chess-Results.

Myndaalbúm (HÁ) - fleiri myndir væntanlegar