Skákþáttur Morgunblaðsins: Bragi og Friðrik í fararbroddi á NM öldunga

Þegar það spurðist út að Friðrik Ólafsson hygðist taka þátt í Norðurlandamóti öldunga urðu skipuleggjendur varir við stóraukinn áhuga á mótinu. Friðrik hefur ekki teflt á opinberu móti hér á landi síðan á minningarmótinu um Jóhann Þór Jónsson sem fram fór haustið 2001 og síðast tefldi hann á Skákþingi Norðurlanda fyrir 40 árum, sem fram fór í Norræna húsinu. Þar vann hann öruggan sigur.

Fyrir marga keppendur mótsins hefur það áreiðanlega verið gamall draumur að tefla við Friðrik. Nokkrir íslensku skákmannanna mættu honum margsinnis hér á árum áður, t.a.m. Magnús Sólmundarson og Gunnar Gunnarsson og í þeirra hópi er einn sem náði að leggja hann að velli í kappskák, Jóhann Örn Sigurjónsson vann það afrek á Skákþingi Reykjavíkur veturinn 1975 og þóttu mikil tíðindi. Hvað varðar erlendu gestina þurfum við gamlir aðdáendur Friðriks ekki annað en að slá upp í bókinni Við skákborðið í aldarfjórðung - 50 valdar sóknarskákir til að sjá að þeir skákmenn sem taldir eru ganga Friðrik næstir að styrkleika, Finnarnir Westerinen og Rantanen, riðu ekki feitum hesti frá viðureignum sínum við Friðrik um miðjan áttunda áratug síðustu aldar.

Friðrik hefur farið fremur rólega af stað en er engu að síður í námunda við efstu menn þegar fimm umferðir hafa verið tefldar. Staðan er þessi:

1.- 4. Bragi Halldórsson, Yrjo Rantanen, Jörn Sloth og Bent Sörensen 4v. 5. - 7. Friðrik Ólafsson, Heikki Esterinen og Gunnar Kr. Gunnarsson 3 ½ v.

Bragi Halldórsson getur rifjað upp Norðurlandamótið 1971 í Norræna húsinu með nokkru stolti því ef greinarhöfund misminnir ekki varð hann þar hraðskákmeistari Norðurlanda. Hann hefur teflt af mikilli hörku á öldungamótinu enda vel undirbúinn eftir þátttöku í afmælismóti Hellis á dögunum. Hann vann þrjár fyrstu skákirnar, lenti síðan í þekktri byrjanagildru gegn Jörn Sloth og tapaði. Fékk síðan að beita uppáhaldsbyrjun sinni, Caro-Kann vörninni, í fimmtu umferð:

NM öldunga 2011:

Jóhann Örn Sigurjónsson - Bragi Halldórsson

Caro-Kann vörn

1. e4 c6 2. Re2 d5 3. e5 c5

Hér ber að varast að leika 3. ... Bf5 vegna 4. Rd4! eins og Bent Larsen sýndi fram endur fyrir löngu.

4. d4 Rc6 5. c3 Bg4 6. f3 Bf5 7. a3 e6 8. Be3 c4 9. b4 f6

Gott var einnig 9. ... cxb3 19. Dxb3 Dd7 en Bragi kýs að halda stöðunni lokaðri.

10. exf6 gxf6 11. Rf4 Dd7 12. Kf2 Bd6 13. Ha2 Dc7 14. g3 O-O-O 15. Bh3 Bxh3 16. Rxh3 Rge7

Svartur hefur komið mönnum sínum á framfæri á þann hátt sem best verður á kosið. Það sama verður hinsvegar ekki sagt um liðsafla hvíts.

17. He2 Rf5 18. f4?

Reynir að sporna við framrás e-peðsins en veikir um of hvítu reitina.

18. ... h5! 19. Bd2 e5 20. b5 Rce7 21. fxe5 fxe5 22. dxe5 Bxe5 23. Bf4 Bxf4 24. Rxf4 h4 25. Re6 Db6+ 26. Kf3 Hd6 27. Hhe1 hxg3 28. hxg3

(STÖÐUMYND)

28. ... Hh3!

(Eftir þennan leik fær hvítur ekki neitt við ráðið. Lok þessara skákar teflir Bragi af miklum krafti.)

29. Rd4 Hxg3+ 30. Kf2 Hd3 31. Hd2 Rxd4 32. Hxd3 Hf6+ 33. Kg2 cxd3

og hvítur gafst upp. Framhaldið gæti orðið 34. cxd4 Dxd4! 35. Hxe7 Df2+ 36. Kh3 Hh6+ 37. Kg4 Hh4+ og mátar.

Norðurlandamótinu lýkur um helgina.

Helgi Ólafsson [e-mail]

-------------------------------

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í Sunnudagsmogganum 18. september 2011.

Skákþættir Morgunblaðsins

[Event "NMoldunga2011"] [Site "Reykjavik"] [Date "2011/9/14"] [Round "r5"] [White "Jóhann Örn Sigurjónsson ISL"] [Black "Bragi Halldórsson ISL"] [Result "0-1"] [Board "r5g4"] [Input "DGT1468"] [Owner "Icelandic Chess Federation"] 1. e4 c6 2. Ne2 d5 3. e5 c5 4. d4 Nc6 5. c3 Bg4 6. f3 Bf5 7. a3 e6 8. Be3 c4 9. b4 f6 10. exf6 gxf6 11. Nf4 Qd7 12. Kf2 Bd6 13. Ra2 Qc7 14. g3 O-O-O 15. Bh3 Bxh3 16. Nxh3 Nge7 17. Re2 Nf5 18. f4 h5 19. Bd2 e5 20. b5 Nce7 21. fxe5 fxe5 22. dxe5 Bxe5 23. Bf4 Bxf4 24. Nxf4 h4 25. Ne6 Qb6+ 26. Kf3 Rd6 27. Rhe1 hxg3 28. hxg3 Rh3 29. Nd4 Rxg3+ 30. Kf2 Rd3 31. Rd2 Nxd4 32. Rxd3 Rf6+ 33. Kg2 cxd3 0-1