Hjörleifur og Áskell efstir á Startmótinu

Það var góðmennt á hinu hefðbundna Startmóti Skákfélagsins í gærkvöld. Mótið markar upphaf á nýju skákári í sumarlok hvert ár. Nú voru 11 kappar mættir til leiks og sumir greinilega búnir að brýna kuta sína duglega fyrir veturinn. Hjörleifur grásleppubóndi tók strax rífandi forystu í mótinu og lét hana ekki af hendi, en nokkrir félagar hans komu höktandi í kjölfarið. Hjörleifur virtist ætla að koma langfyrstur í mark þegar hann lagði Smára að velli í næstsíðust umferð, en samdi svo stórmeistarajafntefli við Atla í lokaumferðinni. Við það setti hann gífurlega pressu á Áskel Örn sem barðist í tvísýnu tafli við Sigurð Arnarson og tókst með naumindum að hafa sigur(ð). Áskell hafði fyrr í mótinu afrekað það einn keppenda að klípa vinning af Hjörleifi og komst upp að hlið hans eftir þessa skák.

Úrslit mótsins í heild sinni:

• 1-2. Áskell og Hjörleifur 9
• 3. Smári Ólafsson 7
• 4. Sigurður Arnarson 6
• 5-6. Jón Kristinn Þorgeirsson og
• Sigurður Eiríksson 5,5
• 7-8. Haki Jóhannesson og
• Karl Egill Steingrímsson 4,5
• 9. Bragi Pálmason 2,5
• 10. Atli Benediktsson 2
• 11. Haukur Jónsson 1,5