Friðrik Ólafsson tekur þátt í sterku og fjölmennu NM öldunga í skák sem hefst í Reykjavík á laugardag

Norðurlandamót öldunga í skák fer fram í fyrsta skipti hérlendis núna í september.  Mótið hefst laugardaginn 10. september og lýkur þann 18. september.  Teflt er í skákmiðstöðinni, Faxafeni 12. Mótið er í senn það langsterkasta og fjölmennasta frá upphafi en fyrsta NM öldunga var haldið 1999 í Karlstad í Svíþjóð á 100 ára afmælisári Skáksambands Norðurlanda og hefur verið haldið á tveggja ári fresti síðan.   Svandís Svavarsdóttir, starfandi menntamálaráðherra, setur mótið og mun leika fyrsta leikinn í skák Friðriks en umferðin hefst kl. 14.  

Til leiks eru skráðir 55 keppendur og þar á meðal 3 stórmeistarar.  Þar ber nafn Friðriks Ólafssonar langhæst en þetta er í fyrsta skipti sem Friðrik teflir á kappskákmóti hérlendis síðan 2002 þegar hann tók þátt í minningarmóti Jóhanns Þóris Jónssonar og stóð sig þar afar vel.  Einnig taka þátt finnsku stórmeistararnir Yrjo Rantanen og Heikki Westerinen.  Sá síðarnefndi er margfaldur Norðurlandameistari öldunga, hefur titil að verja og reyndar sá skákmaður í heiminum sem teflt hefur á flestum Ólympíuskákmótum.  Danski skákmaðurinn Jörn Sloth tekur einnig þátt en hann er fyrrverandi heimsmeistari í bréfskák.    

Margir öflugir og sterkir skákmenn eru einnig í heimavarnarliðinu.  Fyrir utan Friðrik taka þátt tveir fyrrverandi Íslandsmeistarar, Gunnar Kr.Gunnarsson og Björn Þorsteinsson.   Einnig má nefna Magnús Sólmundarson, Braga Halldórsson, Júlíus Friðjónsson, Jón Þ. Þór, Ólaf Kristjánsson, Þór Valtýsson og Jóhann Örn Sigurjónsson. 

Öldungaskák hefur vaxið mikið hérlendis og erlendis síðustu ár og er þá átt við karla 60 ára og eldri og konur yfir fimmtugt.  Það er fagnaðarefni að nú er teflt vikulega í mörgum öldungaklúbbum hér enda sannað mál að skák er heilsubót, ekki síst fyrir eldri borgara. 

Teflt verður daglega og flestar umferðir hefjast kl. 14.   Átta skákir í hverri umferðar verða sýndar beint á netinu.   

Enn er opið fyrir skráningu í mótið!

• Skráningarform
• Heimasíða mótsins (beinar útsendingar)
  
• Chess-Results (keppendalisti og úrslit)