Ingibjörg Edda efst á Meistaramóti SSON

Ingibjörg Edda Birgisdóttir er efst á Meistaramóti SSON að loknum 4 umferðum af 9.  Óhætt að fullyrða að mikið hafi verið um óvænt úrslit á Meistaramótinu í kvöld, Grantas sem er meistari félagsins tapaði í kvöld báðum skákum sínum, fyrst fyrir Magnúsi Garðarssyni og síðan gegn Erlingi Atla. Frábær skák hjá Erlingi Atla þar sem töframaðurinn frá Bakú sá aldrei til sólar.

Magnús Garðars hefur hlotið 3 vinninga í mótinu eftir mjög svo athyglisverða sigra gegn áðurnefndum Grantas og síðan gegn þeim Erlingi Jenssyni og stigahæsta keppenda mótsins Ingimundi Sigurmundssyni.  Sérstaklega góð byrjun og svo sannarlega eftirtektarverður árangur hjá Magnúsi.

Enn betri er þó árangur Ingibjargar Eddu sem hefur lagt alla andstæðinga sína að velli, í kvöld vann hún Erling Atla nokkuð örugglega þrátt fyrir að hafa fengið ívið verra úr byrjuninni og síðan sigraði hún Magnús Matthíasson eftir að hafa sýnt gríðarlega útsjónarsemi í endatafli.  Sannarlega frábær árangur.

Ingvar Örn hefur einnig staðið sig með prýði og deilir öðru sæti með Magnúsi Garðars.

Heimasíða SSON (mótstafla)