Valur, Fram, KR og fleiri félög keppa í skák: Iceland Express Reykjavíkurmótið á laugardaginn

Keppnislið frá íþróttafélögunum í höfuðborginni mætast á laugardaginn á Iceland Express Reykjavíkurmótinu í skák. Fjögurra manna lið keppa um sigurinn, og munu margir bestu skákmenn landsins klæðast keppnistreyju síns félags.

Lið Vals skartar þannig stórmeisturunum Helga Ólafssyni og Jóni L. Árnasyni, auk Jóns Viktors Gunnarssonar fv. Íslandsmeistara. Framarar tefla fram stórmeisturunum Jóhanni Hjartarsyni og Helga Áss Grétarssyni, og alþjóðlegu meisturunum og bræðrunum Birni og Braga Þorfinnssonum.

Stefán Kristjánsson fer fyrir sveit KR og stórmeistarinn Þröstur Þórhallsson klæðist treyju Víkinga, enda miðherji með liðinu upp í 2. flokk á árum áður.

Fleiri sveitir verða vel skipaðar, og má búast við harðri baráttu frá Þrótturum og Leiknismönnum. Með Leikni tefla systkinin Inga Birgisdóttir og Ingvar Örn Birgisson, en fyrirliði Þróttar er Ingvar Þór Jóhannesson. Fylkisliðið er ekki síður sterkt, með alþjóðlega meistarann Guðmund Kjartansson og fleira knáa kappa.

Iceland Express Reykjavíkurmótið á Hlíðarenda er liður í Hverfishátíð miðborgar og Hlíða, sem fram fer á laugardaginn, og er búist við fjöri og fjölmenni.

Tefldar verða 10 mínútna skákir og tefla öll liðin innbyrðis. Sigurliðið fær flugmiða frá Iceland Express, auk þess sem fjölmörg önnur verðlaun verða veitt. Skákakademía Reykjavíkur stendur að mótinu.