Skákmenn klæðast keppnistreyjum: Iceland Express Reykjavíkurmótið á laugardaginn

Keppnislið frá íþróttafélögunum í höfuðborginni mætast á laugardaginn á Iceland Express Reykjavíkurmótinu í skák. Fjögurra manna lið keppa um sigurinn, og munu margir bestu og efnilegustu skákmenn landsins klæðast keppnistreyju síns félags.

Iceland Express Reykjavíkurmótið fer fram í Valsheimilinu að Hlíðarenda og hefst klukkan 13. Mótið er liður í Hverfishátíð miðborgar og Hlíða, og er búist við fjöri og fjölmenni.

Gert er ráð fyrir æsispennandi keppni. Ljóst er að Framarar verða tæpast í botnbaráttunni, enda með stórmeistara og alþjóðlega meistara á öllum borðum. Valsmenn ætla sér sigurinn á heimavelli, en ljóst að lið KR og Víkinga verða líka firnasterk. Þróttarar búa að öflugu skákstarfi, Leiknismenn láta ekki sitt eftir liggja og Fylkismenn mæta galvaskir, enda þjálfari þeirra í fótboltanum kunnur skákáhugamaður.

Tefldar verða 10 mínútna skákir og tefla öll liðin innbyrðis. Sigurliðið fær flugmiða frá Iceland Express, auk þess sem fjölmörg önnur verðlaun verða veitt. Skákakademía Reykjavíkur stendur að mótinu.