Við erum ein fjölskylda: Upphæðin dugar til að hjúkra 1300 alvarlega vannærðum börnum til heilsu!

Skákhátíðinni Við erum ein fjölskylda lauk í Ráðhúsi Reykjavíkur klukkan 18 á sunnudag, með skák Friðriks Ólafssonar stórmeistara og fv. forseta FIDE, og Nansýar Davíðsdóttur, 9 ára. Þau gerðu jafntefli í hörkuskák -- en sigurvegarar helgarinnar eru börnin í Sómalíu.

,,Upphæðin sem hefur safnast, bæði hér í Ráðhúsinu og með símhringingum, meðan á maraþoninu stóð dugar til að kaupa bætiefnaríkt hnetusmjör til að hjúkra 1300 alvarlega vannærðum börnum til heilbrigðis," sagði Þórir Guðmundsson hjá Rauða krossinum. ,,Krakkarnir geta því sannarlega verið stoltir af framlagi sínu."

Alls söfnuðu krakkarnir í Ráðhúsinu næstum heilli milljón króna með taflmennsku sinni, og Þórir sagði að öll umfjöllunin kringum maraþonið hefði skilað sér í skriðu hringinga í styrktarsíma Rauða krossins, 904-1500.

Þannig hefðu 500 hringt í gær, sem skilaði 750 þúsund krónum, til viðbótar við þá tæpu milljón sem gestir Ráðhússins létu af hendi rakna.

Um 20 börn tóku þátt í maraþoninu, og stóðu sig með miklum sóma. Þau unnu hug og hjörtu, þeirra mörghundruð gesta sem lögðu leið sína í Ráðhúsið um helgina. Þeim til halds og trausts voru fjölmargir sjálfboðaliðar úr skákhreyfingunni, auk þess sem foreldrar skiluðu ómældri vinnu.

Skákakademía Reykjavíkur og Skáksamband Íslands stóðu að verkefninu.

Til hamingju, krakkar. Þið stóðuð ykkur frábærlega í þágu málstaðarins!