Hápunktur og lokapunktur glæsilegrar hátíðar í Ráðhúsinu: Friðrik Ólafsson og Nansý Davíðsdóttir gerðu jafntefli!

Hápunktur og verðugur lokapunktur glæsilegrar skákhátíðar í Ráðhúsinu var þegar Friðrik Ólafsson, fyrsti stórmeistari Íslendinga og fv. forseti FIDE, gerði jafntefli í hörkuskák við Nansý Davíðsdóttur, 9 ára.

Friðrik, fæddur 1935, var um árabil meðal allra bestu skákmanna heims, og sá Íslendingur sem lagt hefur flesta heimsmeistara að velli. Hann sigraði t.d. Bobby Fischer og Mikael Tal í tvígang.

Friðrik Ólafsson átti mikinn þátt í stofnun Skákakademíu Reykjavíkur, og sat í undirbúningshópnum sem kom SR á laggirnar. Friðrik er jafnframt sérlegur verndari Akademíunnar.

,,Kannski er þetta í fyrsta sinn sem alþjóðaskákhreyfingin vinnur raunverulega í anda kjörorða sinna," sagði Friðrik, og bar mikið lof á framgöngu íslensku krakkanna, sem teflt hafa linnulaust í Ráðhúsinu til að safna fé fyrir sveltandi börn í Sómalíu.

Hann hreifst af kunnáttu ungu meistaranna, og bar mikið lof á taflmennsku Nansýar. ,,Þú átt framtíðina fyrir þér," sagði meistarinn þegar hann stóð upp frá taflborðinu.

Skák Friðriks og Nansýar verður birt með skýringum á skákhorninu í kvöld.