Ingvar Þór ávaxtakóngur

Vel á þriðja tug manns mætti í Skákakademíuna á fallegu föstudagssíðdegi í þeim tilgangi að gæða sér á ljúffengum ávöxtum og grípa í tafl. Viðburður þessi markaði upphafsumarstarfssemi Skákakademíunnar en í sumar verða um 50 krakkar á námskeiðum í Tjarnargötunni. Meðal kennara í sumar verður landsliðsmaðurinn Hjörvar Steinn Grétarsson en glæsilegt bikarasafn hans var til sýnis í dag. Næsta vetur mun Skákakademían standa fyrir skákkennslu í um 30 skólum Reykjavíkur. Í flestum þeirra skóla verður skákin kennd á stundatöflu þriðjubekkinga.

Áður en sjálft Ávaxtamótið hófst tefldi Róbert Lagerman blindskák við Gauta Pál Jónsson. Tefldu þeir félagar skoska leikinn og vann Róbert mann í miðtaflinu og mátaði Gauta í kjölfarið. Mótið sjálft var fimm umferðir hraðskák. Keppendalistinn var afar fjölbreytilegur og jafnt byrjendur sem FIDE-meistarar meðal þátttakenda. Ingvar Þór Jóhannesson hafði það fram yfir aðra keppendur að hafa varamann. Þannig skipti Ingvar Magnúsi Matthíassyni súper-sub inn á í miðju mótinu til að hvíla sig fyrir lokaumferðirnar. Tókst þetta bragð þeirra félaga með miklum ágætum þar sem Ingvar lagði alla andstæðinga sína og telst Ávaxtakóngur Skákakademíunnar fyrir árið 2011. 

Á meðan að á mótinu stóð voru bornir fram niðurskornir ávextir. Suðrænn andi sveif yfir vötnum salarkynnum Akademíunnar þegar ananas, jarðaberjum, melónum og fleira gómsæti voru gerð góð skil. Hrósa ber yngismeynni Andreu Margréti fyrir vaska framgöngu við framreiðslustjórnun. 

Fjölmargar myndir tala sínu máli frá þessum mikla gleðidegi teknar á glæsilegan hátt af Hrafni Jökulssyni.  

Myndbönd:

Birkir Karl - Hallgerður Helga Ávaxtamót 2011 

Baráttan um Suðurland og skákbækur